FEATUREDIkus LiuNewsSeguransa

Grupu Artemarsiais Nain 42 Kompleta Ona Loron 14 Iha Kuarentena

Fahe Tutan

Naunil Media (Dili), Membru artemarsiais nain 42 kompleta ona loron 14 iha Kuarentena Tasi-tolu hafoin fila husi Atambua Indonezia, tanba membru sira ne’e tama ilegal hodi ba sae sintu.

Tuir Komandante Setor Operasaun, Servisu Migrasaun,  Inspetor Luis do Carmo deklara, servisu investigasaun kriminál (SIK), hamutuk ho Diresaun Jeral Migrasaun halo investigasaun ba sidadaun Timor-oan nain 42 ne’ebé kompleta ona loron 14 iha kuarentena Tasi-Tolu, hafoin hetan deportasaun husi Indonezia iha fulan kotuk, tanba tama ilegál iha fronteira hodi ba sae sintu iha Atambua-Indonezia.

“Sira 42 ne’e tama iha klaster ida 113 ne’ebé, hetan deportasaun husi Indonezia iha fulan kotuk ba maibé momentu ne’e iha ema balu mós hetan pozitivu Covid-19 entaun sira mantein iha ne’eba.

Ho nune’e, ohin ita simu telfone husi mediku sira iha Tasi-tolu, tanba antes ne’e ekipa Jestaun krize entrega ba pilar tres hodi koloka iha kuarentena Tasi-tolu ne’ebé ohin ami ba foti sira nain 42 hodi halo prosesu identifikasaun”, dehan, Luis Carmo ba jornalista sira iha sede Servisu Migrasaun,Vila-Verde, Dili, kinta, (02/09).

Komadante operasaun ne’e hatutan, Diretor jerál migrasaun sei fó sai relatóriu atu bele aselera lalais servisu ne’e, maka parte migrasaun no SIK servisu hamutuk hodi halo identifikasaun ba sidadaun sira ne’e.

“Hafoin halo investigasaun remata, Diretor Jeral Migrasaun sei fó-sai relatóriu idetifikasaun iha tempu besik, Para atu halo servisu ne’e lais liu, entaun ohin ita fahe ema nain 21 ita halo identifikasaun iha sede Migrasaun no nain 21 seluk ita entrega ba SIK halo investigasaun.

Hafoin sira nain 21 PNSIK konklui, entaun entrega fali mai-ami halo identikasaun no ami mós entrega fali 21 ne’e ba SIK halo investigasaun,”nia esplika.

Komadante setor operasaun realsa, nia parte sei impelementa dekretu Guverno no lei migrasaun nian ba sidadaun sira hodi selu koimas ida ne’ebe maximu.

“Entaun bazeia ba dekretu Guverno nian númeru 19/2021, 28 jullu Artigu 7 aline a 4 no-mós lei Migrasaun artigu 147 ita aplika multa maximu $250.00 ba sidadaun sira ne’ebé ho intensaun hakat fronteira ho ilegal”, Luis hato’o.

Nia akresenta, Total sidadaun sira ne’ebé deporta husi Indonezia mai ne’e, iha ema nain 703 no balun maka halo ona identifikasaun, balun hein sira kompleta kuarentena sei prosesa mós sira. Agora dau-daun sidadaun sira ne’ebé antes ne’e koloka iha kuarentena Gleno, Maliana, no Baucau, iha tempu badak wainhira sira kompleta ona kuarentena parte Migrasaun sei halo mós prosesu identifikasaun ba sira. Ana

Leave a Reply

Your email address will not be published. Required fields are marked *