Antonio: Sei Hadia Rejime Salariu Ba F-FDTL No PNTL

Naunil Media (Díli), Vise-Ministru Interior (VMI) Antonio Armindo hateten, sei hadia bem estar ba Falintil-Forsa Defeza Timor-Leste (F-FDTL) no Polisia Nasionál Timor-Leste (PNTL), hodi nune’e bele asegura povu no lori Estadu ne’e ba oin.

 “Ohin enkontru ho Ministru Defeza ne’e, hodi ko’alia kona-ba harmonizasaun ba rejime saláriu ba instituisaun PNTL no F-FDTL nune’e ita bele hahú hadia dau-daun ona bem estar membru instituisaun rua ne’e, Hodi nune’e bele hametin instituisaun estadu ida ne’e, atu iha kbi’it hodi hala’o mandatu tuir Konstituisaun Repúblika Demokrátika Timor-Leste,” dehan VMI iha Ministériu Defeza, Fatuhada, Tersa,(07/09).

Vise-Ministru hatutan, dadaun ne’e sidadaun sira hametin ba servisu seguransa, tanba ne’e iha tempu badak nia laran, tenke hadia seguransa sira-nia bem estar, atu nune’e sira bele asegura povu tomak no bele lori Timor la’o ba oin.

“Lei rejime saláriu rua ne’e sei aprezenta iha tempu badak, hafoin tékniku husi instituisaun rua ne’e finaliza iha semana ida ne’e no sei lori ba Prezidensia Konsellu Ministru (PCM).

Povu ohin loron husu PNTL tenki hametin tan profesionalizmu, nune’e bele hetan nafatin fiar husi povu. Maibé ami hanesan polítiku mós tenke hadia uluk sira nia bem estar hodi nune’e forsa seguransa rua Nasaun ida ne’e, bele halo nia misaun hodi garante seguransa ba povu tomak nune’e lori estadu ne’e bele la’o ba oin,” nia relata.

Antonio akresenta, husu nafatin membru PNTL tomak atu kontinua hadia aan hodi reprezenta Estadu iha fatin ne’ebé de’it, nune’e PNTL bele sai instituisaun ida ne’ebé kredivél tebes.

“Ita rekuñese duni buat barak maka sei falta hahú kedas husi rekursu, ekipamentu no infra-estrutura hirak ne’e, maka ita tau ona iha planu prioridade hodi rezolve fazeadamentu.

Ha’u optimista katak,Timor-Leste iha tinan 20 ba oin sei metin no sei la permiti sé de’it atu doko Estadu. Tanba ne’e, ita hare’e Rai barak ho tinan 70 ona mós laiha vizaun ida ba futuru,”nia esplika. Ana