KHUNTO Triste Ho Servisu MS Nian

Naunil Média (Díli),Bankada Kmanek Haburas Unidade Nasionál Timor oan (KHUNTO), sente triste ho servisu Ministériu Saúde (MS), tanba laiha medida ne’ebé forte hodi kombate moras covid-19 no variante Delta.

Tuir Deputadu Antonio Verdial katak, sente triste  akompaña servisu Ministériu Saúde (MS) nian, tanba laiha  medidas ida ne’ebé ke forte hodi kombate moras Covid-19 nomós moras variante delta aat liu-tan tratamentu ba ema humana laiha seriedade hanesan.

“Ami Sente Triste no akompaña servisu relasiona Ministériu Saúde nian, durante iha situasaun difisil ida ne’e, hanesan ema humanu ne’ebé partisipa direta iha vida politika triste bo’ot akompaña Servisu Ministériu Saúde nian. Variante delta foun ne’ebé maka mosu tan mai Ministériu Saude laiha medidas ida ne’ebé ke forte hodi kombate moras Covid-19 no agora dau-daun sai hanesan preokupadu.

Husu Ministra Saúde ho ninia Vice-Ministra Saúde no nia direjentes sira atu fó atensaun ba pesoal saúde sira hotu, atu trata ema hotu hanesan ho dignu. Labele trata ema hodi haree ba kor, hare’e ba familia no hare’e ba nia ema polítika. Maibé trata ema hanesan, labele bo’ot sira ba maka trata di’ak, ema sira ne’ebé laiha forsa ita trata konforme ita-nia hakarak, informasaun sira ne’e la’os bosok maibé, iha mós evidensia,” dehan  Antonio Verdiál, liu-husi deklarasaun iha sala plenaria PN, Tersa (07/09).

Nia hatutan,  MS oinsá maka bele orienta pesoal saúde sira atu bele halo tratamentu lalais ba pasiente sira hafoin swab, tanba ema nia vida maka importante.

“Husu Ministra Saúde oinsá atu orienta ba pesoal saúde sira atu salva uluk ema nia vida hafoin halo teste swab, liu-liu ba ema sira hanesan moras ne’ebé durante loron 3 ka 4 lahan, wainhira to’o ba iha hospital favor salva uluk ema nia vida depois halo teste swab.

Ba Inan isin rua, ita hatene katak hahoris ema ida la’os fasil, salva uluk inan ho bebe depois halo teste swab, sira ne’ebé moras komplikadu favor salva uluk sira depois halo teste swab, tanba ema sira ne’ebé mak halo hela tratamentu ka programa ba saúde wainhira ba, favor salva uluk sira nia vida”, Antonia realsa.

Nia relata, Ministra tun diretamente ba Hospital Nasionál Guido Valadares (HNGV), la hanesan ona Hospital, maibé hanesan fali kantor ona, tamba ne’e, ema hotu tauk atu ba konsulta no ba baixa iha HNGV.

Ho atendimentu ne’ebé ladun di’ak, ema perfere mate wainhira ema ne’ebé ho moras todan ba, pesoal saúde sira la fo uluk asistensia hodi salva ema nia vida, maibé hakarak obriga uluk ema hodi halo teste swab, la fo importansia ba moras sira seluk hanesan, fase ran, diabetes, rins no moras sira seluk-seluk, tanba konsentra hotu ba covid-19.

Nia akresenta, Governu sempre husu atu estensaun ba estadu emerjénsia, maibé Deputadu sira iha uma fukun Parlamentu Nasionál sempre fó hanoin ba Governu liu-liu ba Ministériu Saúde atu bele foti medidas sira ne’e, labele halai liu ba polítka, maibé haree mós ba ema nia vida. Ana