FEATUREDIkus LiuNewsPolitika

Governu TL hato’o Kondolénsia ba Saudozu Eis-prezidente Repúblika Portugéza

Fahe Tutan

Naunil Media (Díli), Oitavu governu konstitusionál lideradu husi jenerál, Taur Matan Ruak, hato’o sentidu kondolensia profundu ba eis-Prezidente Repúblika Portugéza, Jorge Fernandes Branco de Sampaio, ne’ebé  fila hikas ba aman maromak nia kadunan santu.

“Lori VIII Governu Konstitusionál nia naran, ha’u-nia naran rasik no ha’u-nia kaben nia naran, ami hato’o kondolénsia kle’an ba família, kolega no belun sira husi Saudozu Eis-Prezidente Repúblika Portugéza, Dr. Jorge Fernando Branco de Sampaio, ne’ebé derrepente de’it fila hikas ona ba ita-nia aman Maromak nia kadunan santu,”dehan Primeiru Ministru (PM) Taur Matan Ruak,  liu-husi komunikadu imprensa,  sabado, (11/09).

Xefe Governu ne’e hatutan, durante mandatu rua Eis-Prezidente Jorge Sampaio nian (husi tinan 1996 to’o tinan 2006) katak, Mundu konsiente ba represaun Indonézia.

“Eis-Prezidente Jorge Sampaio, iha tempu ne’ebá aproveita nafatin palku internasionál sira hotu hodi fó apoiu no ativizmu ne’ebé forte ba kauza Timor-oan nian, iha luta ba Direitu autodeterminasaun no Independénsia.

 Saudozu tama iha istória hanesan Prezidente ne’ebé kontribui tebes ba restaurasaun Independénsia Nasionál. Nia rasik  sai hanesan testemuña,  nu’udar  konvidadu de onra iha serimónia ne’ebé hala’o iha loron 20 fulan-maiu tinan 2002, iha Dili Timor-Leste. Eis-Prezidente Jorge Sampaio ne’e sei lembra iha mundu hanesan figura importante liu ba kauza sira no ba liberdade, sei rekoñese nu’udar Timor-Leste no Timor-oan sira nia Belun bo’ot ida”,PM esplika.

Taur relata, liafuan laiha atu hato’o iha tempu susar no tristeza, bainhira lakon belun doben ida, ita-nia pensamentu no orasaun sei hamutuk ho Vosa Exelénsia, belun doben, Dra. Maria José Rodrigues Ritta, ho Ita-bo’ot-nia família, kolega no belun sira hotu, atu bele iha forsa no fiar nafatin hodi hakat liu momentu difisil ida ne’e. Ana

Leave a Reply

Your email address will not be published. Required fields are marked *