FEATUREDGeralIkus LiuNews

PR”Lú-Olo”: TL Lakon Nia Amigu Bo’ot Jorge Sampaio

Fahe Tutan

Naunil Media (Díli), Prezidenti Repúblika (PR), Francisco Guterres “Lú Olo” hateten Timor-Leste lakon nia amigu bo’ot no kompañeru da luta, Eis Prezidenti Portugal Jorge Sampaio, ne’ebé hamutuk ho Timor-Leste (TL) iha momentu sira difísil tebetebes.

Tuir Komunikadu ne’ebé mak Naunil Média asesu iha média Prezidensiál Repúblika nian iha loron Sabadu (11/09).

Lori naran povu Timor-Leste no ninia-an rasik, Prezidenti Repúblika hakerek karta ba ninia omologu Prezidenti Repúblika Portugal Marcelo Rebelo de Sousa hodi ható sentidas kondolénsias ba família enlutada no Portugal ne’ebé lakon ona Eis Prezidenti Portugal Jorge Sampaio. Iha karta ne’e,  Prezidenti Repúblika  hateten:

“Timor-Leste lakon nia amigu ida no kompañeru luta ida iha momentu desizivu ba vida ami-nia País. Ema ida estraordináriu ne’ebé kombina intelijénsia/matenek ho fuan, ema ida nakonu ho asaun. Jorge Sampaio nu’udar ezemplu polítiku nain ida ne’ebé hala’o nia knaar ho seriedade no koerénsia. Nia sempre sai hun ida ba inspirasaun ba ema hotu ne’ebé hakarak serve tan kauza públika ida”, Dehan PR Lú Olo

Prezidenti Repúblika hateten katak Jorge Sampaio nu’udar figura markante no inkontornável istória Portugal, lutador kolen-laek ba liberdade no ba demokrasia. Estadista ida integru no umanu, iha kauza hotu-hotu ne’ebé nia hola parte hatudu nia neon bo’ot luta ba justisa ba dame, ba liberdade no ba diálogu entre sivilizasoins.

Ba ninia omologu, iha momentu tristeza ne’e, Prezidente Repúblika haó gratidaun no rekoñesimentu ba buat hotu ne’ebé Jorge Sampaio,  halo ba Timor-Leste bainhira sai Sekretáriu Internasionál ba Partido Socialista, nu’udar Sekretáriu-Jerál Partidu Socialista, nu’udar Prezidenti Kámara Munisipál Lisboa no nu’udar Prezidente Repúblika Jorge Sampaio hamutuk ho Timor-Leste iha momentus ne’ebé difisil liu.

Bainhira timoroan na’in-rua simu Prémiu Nobel da Paz,  iha Dezembru 1996, Jorge Sampaio asiste serimónia atribuisaun prémiu iha Oslo Norwegia.

“Iha tempu ne’ebé nia hatene katak Indonézia fó sinais sei muda nia pozisaun iha relasaun ho Timor-Leste, Jorge Sampaio, nu’udar Xefe Estadu, hametin kedas nia atividade ba kauza Timor-Leste, hatudu dala ida tan nia koñesimentu klean kontestu internasionál no nia vizaun estratéjika”,  Prezidenti Ripúblika hateten.

Iha 1999 hafoin referendu ne’ebé nakonu ho violénsia, Jorge Sampaio sai fulan insónia no serbisu makaas liután, iha kalan no loron atu hases tragédia ba timoroan sira. “Kauza Timor nian halo Sampaio tanis,” Prezidenti Repúblika hateten.

Timor-Leste haksolok tebes no orgullu ho prezensa Jorge Sampaio nian iha Díli, asiste isar Bandeira no rekoñesimentu internasionál ba Estadu Timor-Leste, iha 20 maiu 2002.

Parlamentu Nasionál atribui títulu Cidadão Honorário da Repúblika Demokrátika de Timor-Leste ba Jorge Sampaio iha nia vizita ikus mai Timor-Leste iha 2006.

Iha 2016, Estadu Timor-Leste rekoñese Jorge Sampaio nia solidariedade no apoiu ativu iha luta ba independénsia país nia ho Grande Colar de Ordem de Timor-Leste, rekoñesimentu ida aas liu iha Timor-Leste.

“Ema bo’ot sira  hanesan nia nunka mate tanba nia legadu sira sei hela metin husi jerasaun ba jerasaun,” Prezidente Repúblika hateten. *Jos

Leave a Reply

Your email address will not be published. Required fields are marked *