DJSM Prosesu Timor-oan Na’in 192 Iha Baucau, Hafoin Deportasaun Husi Indonézia
Naunil Media (Baucau), Komandante Sektor Operasaun, inspetur Polisia Luis do Carmo hateten, ekipa Investigasaun Liu-husi diresaun jerál servisu migrasaun (DJSM), halo tan identifikasaun ba sidadaun Timor-oan na’in 192 ne’ebé antes ne’e halo deportasaun husi Indonézia.
Tuir komadante sektor operasaun katak, halo identifikasaun ba sidadaun Timor-oan sira ne’e, tamba kompleta ona sira-nia kuarentena durante loron 14 iha, Gedung Olah Raga (GOR), Suku Tirilolo, postu administativu Baucau, Munisipiu Baucau.
“Atu informa de’it, ohin kalan ne’e servisu migrasaun halo ona prosesu administrativu ba sidadaun Timor-oan na’in 192 sira ne’ebé kompleta ona sira-nia loron, iha kuarentena GOR Baucau durante loron 14, ne’ebé antes ne’e hetan deportasaun husi Indonezia iha fulan kotuk ba, tanba tama ilegal iha Fronteira ba iha Atambua-Indonézia,” informa inspetur Polisia, Luis do Carmo, liu-husi via telefone iha Domingu 12/09.
Komadante ne’e hatutan, durante prosesu administrativu iha sidadaun balun ne’ebé rekuza la selu multa sei haruka ba Polisia servisu investigasaun kriminál Nasionál (PSIKN) hodi tuir prosesu kriminál nian.
“Wainhira ekipa investigadór husi migrasaun remata prosesu identifikasaun no iha balun maka rekuza selu koima sei entrega fali ba servisu investigasaun Kriminál Nasionál hodi kontinua halo investigasaun ba prosesu kriminál nian no sei haruka ba Ministériu Públiku hodi prosesa tuir lei”, nia relata.
Nia informa, hahú husi inísiu, nia parte aplika multa maximu $250.00 ba kada ema sira ne’ebé konsege tama to’o área Indonézia nian, enkuantu sidadaun Timor-oan sira ne’ebé halo negósiu ilegal iha de’it liña Fronteira, migrasaun aplika koimas minimu. Ipe
