PR “Lú Olo” Promulga Alterasaun Dahuluk Dekretu-Lei Estatutu (IQTL)

Naunil Media (Díli), Prezidenti Repúblika (PR), Francisco Guterres “Lú Olo” promulga alterasaun dahuluk ba Dekretu-Lei kona-ba Estatutu Instituto para a Qualidade de Timor-Leste, I.P. (IQTL).

Tuir Komunikadu ne’ebé Naunil Média asesu iha média Prezidensiá Repúblika segunda, (13/09) hateten Chefe estadu Promulga Alterasaun Dahuluk Dekretu-Lei Estatutu (IQTL).

Alterasaun dahuluk ba Dekretu-Lei nee halao ba kompozisaun orgaun sira no rekizitus neebé kesi IQTL, aumenta númeru membrus no konkretiza kompeténsias neebé pertense ba orgaun sira IQTL ninian. Hala’o mós harmonizasaun ekiparasaun ba kategorias titular kargu sira iha orgaun sira IQTL nian. Kláuzula Estatutu IQTL neebé sai parte integrante husi Dekretu-Lei neebé kria institutu nee mós sai sujeitu ba alterasoins.

Entre artigu sira neebé hetan alterasoins mak artigu 3 neebé dehan katak IQTL bele halao servisu territorialmente deskonsentradu. Ministru Turismu, Komérsiu no Indústria mak sei tutela no iha kompeténsia nomea no ezonera Konsellu Administrasaun no Konsellu Fiskal IQTL, I.P,  (iha kazu nomeasaun no ezonerasaun Konsellu Fiskal,  Ministru Finansas mak tenke propoin).

Konsellu Administrasaun sei kompostu hosi prezidenti ida, sekretáriu ida no vogais nain 3, nomeadu husi Ministru ne’ebé tutela. Molok ida-nee, Konsellu Administrasaun kompostu hosi prezidenti no vogais nain 2, nomeadu hosi Konsellu Ministrus, bazeadu ba proposta hosi Ministru tutela. Konsellu Fiskal sei kompostu hosi membru nain 3, nomeadu hosi Ministru tutela, bazeadu ba proposta hosi Ministru Finansas. Molok ida-nee, Konsellu Fiskal kompostu husi membru nain-rua, nomeadu husi Konsellu Ministrus (ida indikadu husi Ministru Finansas no ida seluk husi Ministru Turismu, Komérsiu no Indústria neebé tutela ba institutu públiku nee).

Iha ámbitu kompeténsias ninian, Konsellu Administrasaun mai ho kompeténsias foun, mak hanesan, propoin ba Ministru tutela aprovasaun mapa pesoal, elabora pareseres, informasoins neebé mak Ministru tutela solisita no ezerse poder disiplinar (artigu 9). Prezidente Konsellu Administrasaun iha kompeténsia foun, inklui define ordem traballu no reuniaun Konsellu Administrasaun nian no hatoo pareser ba Konsellu Fiskal (artigu 13).  Kompeténsia foun ba Konsellu Fiskal mak fó pareser kona-ba akizisaun, arrendamentu, alienasaun no onerasaun bens imóveis, fó nafatin informasaun ba Konsellu Administrasaun kona-ba rezultadu verifikasaun no ezames neebé mak halao no propoin ba Ministru tutela no ba Konsellu Administrasaun kona-ba promosaun auditoria esterna.

Instituto para a Qualidade de Timor-Leste, I.P sei organiza tuir departamentus haat: Departamentu Administrasaun, Departamentu Normalizasaun, Departamentu Metrolojia no Departamentu Kualifikasaun no Asuntus Internasionais. Dirijentes husi kada departamentu sei ekiparadu ho Xefe Departamentu. Molok alterasaun nee, dirijente sira-nee ekiparadu ho Diretores Nasionais.

Membrus Konsellu Administrasaun no Konsellu Fiskal ekiparadu ho Diretores Nasionais no Prezidenti Konsellu Administrasaun deit mak ekiparadu ba Diretór-Jerál. *Jos