Xefe Suku Guiso No Lisadila Hasoru Malu Ho Prezidente Komisaun E

Naunil media (Díli), Xefe suku Guiso no Lisadila, Postu Administrativu Maubara, Munisípiu Likisa, hasoru malu prezidente komisaun E ne’ebé trata asuntu infraestrutura.

Ko’alia konaba Mota Loes ne’ebé maka nia luan kuaze 2 kilometru(km) kontinua harahun komunidade nia uma bainhira iha tempu udan monu rai.

Tuir Xefe Suku Guiso, Liberato Araujo Nunes informa,  akontese husi Mota Loes, no mota sira iha foho, sobu komunidade nia uma no iha tinan hira liu ba sobu ka harahun uma komunidade hamutuk 80 resin.

“Iha Mota Loes sobu komunidade nia uma 80 resin ne’e husi Suku Guiso nian de’it, ho sira-nia rai to’o uma ba hotu, iha mota laran. Tanba ne’e, autoridade husi suku Guiso ho Lisadila deside marka audénsia ho Prezidente Komisaun E,”dehan xefe suku Guiso hafoin hasoru malu ho Komisaun E ne’ebé trata asuntu infraestrutura, iha Parlamentu Nasionál,kinta (16/09).

Xefe suku hatutan, Iha tinan 2015 liu ba, Primeru Ministru, Taur Matan Ruak, kuandu sei Prezidente repúblika, nia ba vizita to’o iha ne’ebá hodi hare’e no hato’o mós suku rua ne’e nia preukupasun, maibé to’o agora laiha rezultadu liu.

“Tanba suku rua, suku Guiso no suku Lisadila, sempre hetan inundasaun, no problema ne’e autoridade levanta dala barak ona. No Sorti liu-husi ami-nia mata dalan maka NGO, NDI, hatudu dalan, ohin ami bele mai hasoru malu ho prezidente Komisaun E hodi ko’alia kona-ba problema hirak ne’ebé maka akontese tina-tinan iha ami0nia área ne’e”,nia relata.

Iha fatin hanesan, Xefe suku Lisadila Fernando Lobo deklara, Kona-bá dezastre natural ka inundasaun ne’ebé suku Lisadila enfrenta iha 2017, konsege sobu komunidade nia uma hamutuk 79 nian.

“Iha tinan 2017 hetan estragus uma kain hamutuk 79, inklui igreja nomós ema nia kios, kintal ho animal sira hotu. Iha tinan 2018 to’o 2019 mós hanesan hotu sobu nafatin komunidade nia hela fatin ho komunidade nia to’os hotu.

Maske momentu ne’eba halo ona pedidu ba Obras Públika, Komisaun E Parlamentu Naisonál ho Primeiru Ministru Taur Matan Ruak liu-husi audénsia ho asesór Primeiru Ministru, iha Palásiu Governu. Ida ne’e maka horiseik sira telefone ami, ohin ami mai hasoru malu iha ne’e, ami-nia problema ami hato’o para ba oin bele tau netik kestaun ida ne’e, bele tau netik hanoin ida ba suku rua ninia problema”,Fernando Lobo hato’o.

Nune’e, Prezidente Komisaun E Abel Pires, hatan ba problema hirak ne’e, promete sei marka tempu ida ba hare’e fatin refere, mais data seidauk determina, maibé sei ba hare’e iha fatin, pois maka sei ko’alia ba oin ne’e halo nusa.

Iha tempu Portugés, Mota-Loes ne’e nia luan 900- resin, maibé ho situasaun udan ne’ebé monu rai kada tinan to’o ohin loron nia luan hahú aumenta ba kilometru rua-resin de’it, ne’ebé fó ameasa no estraga hotu área produtividade iha suku rua refere ne’e hotu. ANA