PM: Destaka F-FDTL Iha Fronteira Atu Rezolve Problema La’os Aumenta Problema
Naunil Media (Dili), Primeiru Ministru Taur Matan Ruak hateten, atu destaka Falintil Forsa Defeza Timor-Leste (F-FDTL) iha fronteira naturalmente Governu rona opiniaun hotu, hodi nune’e labele viola Konstituisaun no atu rezolve problema la’os atu aumenta problema.
“Ne’e sei prosesu hela naturalmente ami sei rona opiniaun balun mas ami-nia esforsu maka ne’e, medidas hotu-hotu ne’ebé Governu toma, primeiru labele viola ita-nia Konstituisaun no lei sira, Segundu intermus polítiku ne’e kontribui para rezolve problema la’os kontribui aumenta problema, ida ne’e mak prinsipiu orienta Governu nia esforsu para atu buka solusaun ba ida ne’e”, dehan Xefe Governu Taur Matan Ruak, ba Jornalista sira hafoin remata enkontru semanal ho Prezidénte Repúblika (PR) Francisco Guterres “Lú Olo” iha Rezidensia Farol Kinta, (16/09).
Taur Matan Ruak hatutan, atu tau F-FDTL iha fronteira presiza rona mós Prezidente Repúblika hanesan komandante supremu, tanba uluk Taur sei mós propoin tau polísia iha fronteira.
“Naturalmente tau forsa iha ne’ebá ultimu palavra ne’e so prezidente Repúblika hanesan komandante supremu, agora uluk ha’u sei Jenerál ha’u maka propoin tau polísia ne’e por razoens.
Mas ha’u hanoin altura ona para ita haree mudansa iha ne’ebá reforsa malu, tanba ita-nia sistema defeza ne’e sistema integradu kooperativu tanba ne’e importante ita tenke hametin para evita krime organizadu iha ita-nian krime transnasionais ne’e importante”, nia esplika. Jos
