Vise-MI Hakarak Aumenta Postu Foun 13 ba UPF
Naunil Media (Bobonaru),Vise-Ministru Interior (MI), Antonio Armindo, deklara sei aumenta harii tan postu foun 13 ba Unidade Polísia Fronteira (UPF).
Membru Governu konstitusionál da-ualu informa asuntu ne’e ba jornalista sira, hafoin hala’o vizita trabalho ho ekipa iha liña fronteira, suku Cowa, postu administrative Balibo, Munisípiu Bobonaro, Segunda (20/09).
“Komandante jeral ho komitiva tomak hamutuk ho parseria TLPDP no tekniku sira hodi observa fatin balu ne’ebe antes ne’e identifika ona nune’e atu hari tan postu. Dau-daun ita hanoin atu aumenta tan postu foun hamutuk 13 ne’ebe sei koloka iha Postu Mota-Ain, Badut-Mean, Ponte Nunura, Suai ho RAEOA hodi nune’e bele kontrola movimentu ilegal iha liña fronteira”, esplikaGovernante ne’e iha Postu UPF Derok Ren
Nia informa, orsamentu ba konstrusaun postu refere sei mai hosi fundu Covid-19, hafoin iha semana kotuk Konsellu Jestaun Fundu Covid-19 aprova pedidu orsamentu ho montante $ 990.000.00 ba Ministeriu Interior atu utiliza.
“Ita mos hetan orsamentu hosi parseria TLPDP (Timor-Leste Police Development Program) ne’ebe halo ona postu seguransa 6 ba PNTL ne’ebe hetan ona inaugurasaun hosi ita nia Primeiru-Ministru iha fulan kotuk liu ba”, hatutan Nia
Antonio dehan, iha postu sira refere sei kompleta ho fasilidade sira hanesan karteiras, Bee-mos no eletrisidade hanesan pakote ida enkuantu laiha koneksaun eletrisidade sei instala solar painel.
Tuir Nia, sei menus rekursu iha fronteira, nune’e tinan oin sei aumenta tan membru UPF.
Iha fatin hanesan, Komandante Jerál PNTL, Komisariu Polísia Faustino da Costa, informa hateten relasiona ho Guvernu nia planu atu hadiak postu iha fronteira, politika hosi Komandu Jeral PNTL nian hakarak koloka tan membru sira iha fronteira hodi tau atensaun masimu iha liña fronteira sira.
“Asuntu ida ne’e ita hahu lao dau-daun ona desde asuntu Covid-19 nian. Ita koloka deit iha postu temporaria entaun ho projetu sira ne’ebe dau-daun Guvernu kontinua ne’e hafasil identifika ema tama sai ita nia fronteira ne’e”, subliña nia
Ekipa vizita trabalho lidera husi Vise-Ministru Interior, Antonio Armindo, akompaña hosi Komandante Jeral PNTL, Komisariu Polisia Faustino da Costa, Komandante Komandu Operasaun PNTL, Superintendente Xefi Pedro Belo, Komandante UPF, Superintendente Euclides Belo no reprezentante TLPDP, Mark Silvertand nu’udar Koordenador Treinamentu no Operasaun. Ana
