Lere: Hakarak Ka Lakohi F-FDTL Tenke Ba Fronteira
Naunil Media (Dili), Xefe Estadu Maior Generál das Falintil Forsa Defeza Timor-Leste (F-FDTL) Tenente Generál Lere Anan Timur hateten, biar opiniaun husi líder Nasionál sira lahanesan atu destaka forsa iha Fronteira, maibé hakarak ka lakohi Fronteira tenke tau forsa duni, tanba ne’e desizaun Governu nian.
“Ami ko’alia uituan kona-ba forsa sira ba Fronteira, forsa ba Fronteira biar iha deverzensia ka opiniaun lahanesan liu-liu ba líder Nasionais, maibé hakarak ka lakohi forsa tenke ba Fronteira duni, ne’e desizaun Governu ninian”, dehan Lere Anan Timur ba Jornalista sira hafoin remata enkontru ho Prezidente Repúblika Francisco Guterres “Lú Olo” iha palásiu Prezidente Nicolau Lobato Bairru Pite, Kuarta, (22/09).
Lere hatutan, la’os razaun destaka F-FDTL iha Fronteira bele kria konflitu ho polísia, maibé nia dehan laiha diferensia, tanba forsa rua servisu atu kompleta malu.
“La’os razaun katak, forsa armada ba ne’e bele kria konflitu entre instituisaun rua ne’e, ha’u dehan laiha diferensia ida komplementaridade sira, forsa rua tantu Polísia Nasionál Timor-Leste ho F-FDTL kompleta malu, Servisu saida maka Polisia nian sira halo ninian, saida maka F-FDTL nian halo ninian.
Kualker lei liu-liu lei defeza Nasionál konsetu estratéziku defeza Nasionál mai husi konstituisaun, entaun konstituisaun dehan defeza externa iha forsa armada nia liman sen duvida, nia tenke ba iha ne’ebá ne’e, la’os kria konflitu iha instituisaun rua ne’e, fiar katak laiha Polísia ka F-FDTL la’os atu ba jere Fronteira sira ba halo seguransa ba Fronteira”, Tenente Generál esplika.
Xefe Estadu Maior Generál das Falintil akresenta, atu Jere Fronteira ne’e komisaun integradu ida maka ba jere Fronteira la’os sira seguransa ne’e maka jere Fronteira hanoin katak komentáriu sira ne’e mós tenke komprende didiak. Iha biban ne’e Prezidente Repúblika Francisco Guterres “Lú Olo’ mós Konkorda atu destaka Falintil Forsa Defeza Timor-Leste (F-FDTL) iha Fronteira, tanba ko’alia kona-ba lei defeza Nasionál ne’e mai husi konstituisaun.
Antes ne’e mós primeiru Ministru (PM) Taur Matan Ruak deklara ona, atu destaka F-FDTL iha Fronteira ne’e naturalmente Governu sei rona opiniaun hotu no destaka forsa para atu rezolve problema la’os kontribui aumenta problema.
“Ne’e sei prosesu hela naturalmente ami sei rona opiniaun balun mas ami-nia esforsu maka ne’e medidas hotu-hotu ne’ebé Governu toma primeiru, labele viola ita-nia konstituisaun no lei sira, Segundu intermus polítiku ne’e kontribui para rezolve problema la’os kontribui aumenta problema ida ne’e maka prinsipiu orienta Governu nia esforsu para atu buka solusaun ba ida ne’e”, dehan Xefe Governu Taur Matan Ruak.*Jos
