FEATUREDIkus LiuNewsPolitika

PR: TL Lakon Luta Libertasaun Nasionál Espesial Ida

Fahe Tutan

Naunil Media (Díli), Prezidente Repúblika (PR) Fransisco Guterres “Lú Olo” hateten, horseik Timor-Leste lakon tan  asuwa’in luta libertasaun Nasionál espesiál ida,  tanba   halo parte jerasaun fundadór movimentu ba ukun  rasik an  dahuluk ho ámbitu Nasionál.

Liu-husi Mensajen Xefe estadu ba asuwa’in Ma’Huno Bulerek Karathayano ne’ebé hala’o iha palásiu Prezidente Nicolau Lobato, Bairro Pite, Sabadu, (25/09).

“Ho naran asuwa’in, Ma’Huno Bulerek Karathayano, tama iha istória  luta libertasaun Patria, nu’udar Fundadór ASDT, membru Comite Central Fretilin (CCF), Xefe konsellu Polítiku Militár Frente Armada, Sekretário da Comissão diretiva da Fretilin, Comandante das FALINTIL, Secretario Região 3, lider ida ne’ebé inspira no sai belun bo’ot  ba  foin-sa’e klandestina sira  iha vila laran, iha Timor-Leste no iha Indonézia.

Iha periódu susar  tebes, hafoin  militár Indonézia kaer komandante Superior  Luta, Xanana Gusmão, iha 1992, ema barak hanoin luta to’o ona nia rohan, maibé Ma‘Huno asume lideransa  rezisténsia nian  no  funu kontinua”, Prezidente esplika.

Aman ba Nasaun ne’e hatutan, Iha marsu 1993,  forsa okupante kaer lider ne’e  no hatama iha kadeia, maibé la hamate ninia espíritu Nasionalista.

Iha vila, Ma’Huno serbisu hamutuk ho Ma’Hodu kontinua mobiliza juventude sira iha luta hasoru okupasaun Indonézia. Ma’Huno  esforsu ba  hametin rezisténsia iha zonas okupadas no nune’e kontribui ba   luta klandestina sai mós  frente  prinsipál ida ba Timor-Leste nia independénsia.

“Ma’Huno nu’udar jerasaun fundadór husik ona ita, triste tebes tanba ita lakon ita-nia lider bo’ot ida,  maibé ita hotu sei la haluha katak  nia husik memória ba  ita-nia  Timor-Leste livre no independente. Ma’Huno nia obra sei hela rohan-laek, bainhira valor no prinsípiu luta nian kontinua buras hamutuk ho ita, iha ita-nia moris loro-loron ninian.

Prezidente Repúblika hato’o profundas kondolénsia ba família enlutada, Sra. Terezinha Viegas ho nia oan sira, ba família tomak nomós família bo’ot rezisténsia nian”, Prezidente relata.*Jos

Leave a Reply

Your email address will not be published. Required fields are marked *