PN Aprova Pezar Ba Saudozu Ma’Huno Bulerek
Naunil Media (Díli), Parlamentu Nasionál aprova ona votu pezár ho umanimidade ba saudozu José António da Costa Ma’Huno Bulerek Karathayano, ne’ebé fila- hikas ona ba Aman Maromak nia kadunan santos iha sexta (24 setembru 2021) iha Hospital Nacionál Guido Valadares (HNGV).
Votu númeru 27/V(4ª) ne’e aprovadu ho rezultadu votasaun a-favór 53, kontra zero ho abstensaun zero
Prezidenti Pralamentu Nasionál (PPN), Deputado Aniceto Longuinhos Guterres Lopes, Hatete nu’udar omenajen ba komandante, kamarada no kompañeiru Ma’Huno Bulerek Karathayano.
“Eroi ba independénsia, espíritu abnegasaun, korajen, sakrifísiu sei sai ezemplu no inspirasaun ba ita no ba povu tomak hodi hatutan ba libertasaun nasionál”, Dehan Prezidenti Parlamentu Nasionál Deputadu Aniceto Longuinhos Guterres Lopes, liu husi sala plenária PN,segunda (27/09).
Xefe Bankada FRETILIN, Deputadu Francisco Miranda Branco, hateten votu pezár ne’e nu’udar omenajen ikus ba líder no komandante bo’ot ba rezisténsia nasionál Ma’Huno Bulerek Karathayano.
“Ma’Huno Bulerek Karathayano nu’udar figura únida ida iha ita-nia istória, polítika ida hosi fundadór ASDT ne’ebé nakfilak ba FRETILIN, foti kilat nu’udar kombatente hasoru okupasaunilegál Indonézia no ikus kaptura tiha hosi inimigu”, Haktuir Nia.
Nia dehan, Biat Kruél destinu taka tiha nia ibun, maibé nia nafatin espresa liu hosi jestu de’it tanba kauza hosi moras ne’e.
Reprezentante Bankada CNRT, Deputada Virgínia Ana Belo, sente triste tebes, tanba lakon líder inspiradór ne’ebé fó ona inspirasaun iha polítika no programa CNRT durante ne’e.
“Saudosu nu’udar ema ida ne’ebé sempre tau aas interese povu no partidu nian nu’udar interese Estadu”, Nia informa
Nia afirma, Saudozu Ma’Huno Bulerek Karathayano hatudu ona ninia konsisténsia, firme iha luta no persisténsia hamutuk ho povu no luta-na’in sira seluk ne’ebé mak mate tiha ona.
“Heroi sira nia mate mak ita nia rain hetan independénsia,” Nia fó sasin.
Bankada Partidu Libertasaun Popular PLP, Deputada Maria Angelica Lopes Sarmento, Hateten maske Ma’Huno Bulerek Karathayano la hamutuk ho povu Timor-Leste ona, maibé ninia espíritu sei hamutuk ho povu.
“Nia memória sira, nia karáter, nia figura rezisténsia, nia determinasaun no persisténsia ba ita-nia luta ba libertasaun nasionál sai inspirasaun ba povu Timor-Leste atu kontinua nia obra no valór luta nian ne’ebé nia husik hela”, Nia deklara
Entretantu bankada parlamentár sira seluk hanesan PD, KHUNTO, UDT, Frente-Mudança no PUDD ható sentido kondolénsia kle’an ba família enlutada. Ana
