Jerasaun Martires Observa Rekrutamentu F-FDTL Foun Laiha Imparsialidade Ba Juventude

Naunil Media (Díli), Jerasaun Martires no antigu kombatente  Libertasaun Nasional sira husi Kaixa komandu 03 Hudi-Laran, observa rekrutamentu Falintil Forsa Defeza Timor-Leste (F-FDTL) iha tinan 2021 ladun iha imparsialidade ba Juventude sira, tanba membru regime espesial balun la pasa.

Liu-husi Konferensia imprensa Porta-voz, Julio da Silva Sarmento hatete, Iha tinan 2021 Falintil- Forsas Defeza Timor-Leste loke rekrutamentu foun ba Joventude feto no mane atu kompete liu-husi pakote rua (2) hanesan regime espesial ba veteranus no Kombatente nia oan ou familia no regime gerál ba públika.

“Ami Jerasaun Martiris no antigos kombatentes da Libertasaun Nasionál sira husi kaixa komandu 03 Hudi Laran, Manleuana, Dili,    hare’e katak, ba sitausaun realiadade ne’ebé maka akontese iha prosesu rekrutamentu iha Komisaun ladun fó imparsialidade ba Juventude sira ne’ebé maka kompete iha prosesu rekrutamentu membru foun F-FDTL ne’e,” dehan porta-voz,  ba Jornalista, liu-husi konferensia imprensa, Iha Jardin 5 de Maiu, Segunda, (27/09).

Porta-voz hatutan, Liu-husi ne’e sira husu ba responsabilidade prezidente komisaun rekrutamentu membru foun F-FDTL tinan 2021, Brigadeiru Jenerál, Calisto Santos Coliati atu klarifika no justifika ba públiku konaba prosesu rekrutamentu membru foun F-FDTL tinan 2021, tamba kandidatura husi regime espesial ne’ebé lapasa iha prosesu rekrutamentu.

“Ami nia preokupasaun rezultadu kandidatura membru foun F-FDTL tinan 2021 ne’ebé públika iha loron 15 Setembru 2021, ami husu imediatu ba komisaun atu Klarifika no Justifika prosesu rekrutamentu ba públika ho sistema ou kritéria rekrutamente nian.

Rezultadu kandidatura membru foun F-FDTL tinan 2021 ne’ebé públika iha loron 15 fulan Setembru tinan 2021, tuir ami nia hare’e Lahatudu balansu tuir Sistema no Kritéria rekrutamentu, tamba kandidatura membru foun F-FDTL, maiória husi Munisipiu balun maka okupa”, nia esplika.

 Julio akresenta, husu ba komisaun kandidatura membru foun F-FDTL atu hatudu profisionalidade, imparsialidade no integridade institusionál ne’ebé reprezenta Povu no Nasaun.

“Ami lakonkorda ho sistema familarizmu ne’ebé komisaun komete hodi elimina kandidatura husi Jerasaun martiris no antigus kombatentes Libertasaun Nasionál oan sira.

Jerasaun Martires rekomenda ba Presidente da Republika  Fransisco Guterres Lú-Olo, atu foti asaun imediatu ba profisionalizmu no imparsialidade komisaun rekrutamentu membru foun F-FDTL tinan 2021”, nia realsa.

Porta-voz sujere ba Primeiru Ministru (PM) Taur Matan Ruak, atu fó hanoin ba komisaun rekrutamentu membru foun F-FDTL tinan 2021 hodi hadia sistema rekrutamentu ba futuru. Ana