Lere: Aprezenta Preokupasaun F-FDTL Nian Ba PR “Lú Olo”
Naunil Media (Dili), Xefe Estadu Maior Generál das Falintil Forsa Defeza Timor-Leste (F-FDTL),Tenente Generál Lere Anan Timur (LAT), aprezenta Preokupasaun Forsa Armada nian hanesan kondisoens infrastrutura, liu-liu transporte ba Xefe estadu.
Tenente Jeneral hato’o lia hirak ba Jornalista, bainhira remata hasoru malu ho Prezidente Repúblika (PR), Francisco Guterres “Lú Olo” iha palásiu Prezidente Nicolau Lobato Bairru Pite, Kuarta, (29/09).
“La’os ba kadetas foun de’it, mas ba forsa armada tomak iha preokupasaun ne’ebé ke ha’u aprezenta ba Prezidente Repúblika ne’e maka kondisoens meus ba forsa armadas liu-liu transporte infrastrutura.
Ba komponente Navál presiza Ró, atu kumpri didi’ak nia misaun seguransa fronteira maritima ninian, i infrastrutura ba komponente Navál liu-liu kais purke 2023 Juñu hanesan ne’e Ró husi Austrália to’o. Até agora seidauk bo’ok kais, ne’e maka Ministru defeza tenta apresa lalais orsamentu iha ona ba Portu Hera atu nune’e bele simu Ró rua husi Austrália ne’ebé 2023 sei mai parese iha Juñu ou Jullu”,dehan Tenente Jeneral Lere Anan Timur.
Lere esplika, preokupasaun hirak ne’e xefe estadu tenke hato’o ba Governu, liu-liu Primeiru Ministru no PR labele deside tanba, OGE 2022 besik ona atu debate.
“Agora preokupasaun hirak ne’e, Prezidente Repúblika tenke hato’o fali ba Primeiru Ministru kalae? prezidente Repúblika labele deside purke orsamentu 2022 mós besik ona Outubru hanesan ne’e debate ona konaba OGE 2022.
Ministru Defeza maka tenki ba, defende orsamentu ne’e presiza saida-saida hanesan baibain nia (Lere) dehan to’o ona tempu forsa armada ne’e sai Profesionál, forsa armada ne’e tenke dezenvolvidu, maibé profesional no dezenvolvidu ne’e presiza kondisoens presiza meus hotu-hotu atu bele kumpri didi’ak nia misaun”, nia relata.
Iha biban ne’e nia mós informa konaba rekrutamentu nian katak, iha loron 27 imkompora ona 600 ba kandidatus foun ne’ebé ke agora iha Metinaro, sira iha ne’ebá ne’e sei kumpri fulan tolu ou fulan haat maka sira presta juramentu ba Bandeira.*Jos
