Lere: Destaka F-FDTL Iha Fronteira La Kontra Konstituisaun
Naunil Media (Dili), Xefe Estadu Maior Generál das Falintil Forsa Defeza Timor-Leste (F-FDTL) Tenente Generál Lere Anan Timur hateten, destaka F-FDTL iha fronteira lakontra Konstituisaun, tanba Konstituisaun dehan defeza externa ne’e iha forsa armada nia liman.
“Ha’u hanoin katak, destaka forsa armada iha fronteira ne’e lakontra Konstituisaun ida, ate propriu Konstituisaun mós dehan defeza externa iha forsa defeza nia liman, defeza interna maka iha polísia nia liman”,dehan Tenente Jeneral Lere Anan Timur ba Jornalista hafoin hasoru malu ho Prezidente Repúblika (PR), Francisco Guterres “Lú Olo” iha palásiu Prezidente Nicolau Lobato Bairru Pite, Kuarta, (29/09).
Tenente General hatutan, Forsa rua ne’ebé servisu iha fronteira tantu defeza externa no Seguransa interna atu kompleta malu la’os Polítika sira ko’alia ne’e amesea. Nia rasik ko’alia ona ho Jeneral sira husi Indonézia oinsá para forsa rua ne’e koopera malu treinamentu konjuntu no sai familiariza ba malu.
“Ha’u hanoin forsa rua ne’e kompleta malu tantu defeza externa no Seguransa interna sira kompleta malu, la’os hanesan polítiku sira ko’alia katak kuandu forsa armada destaka iha fronteira ne’e ameasa, ameasa ba saida? Ha’u rasik mós ko’alia ho Jenerais Indonézia sira liu-liu Jenerais sira ne’ebé maka uluk funu iha Timor halo oinsá para ami forsa rua ne’e koopera malu treinamentu konjuntu sira, familiariza ba malu”, Lere realsa.
Generál akresenta, polítiku sira mós tenke sukat, tanba Indonézia hatene katak, iha fronteira ne’ebá ne’e ema militár maka iha fronteira, sira hakarak servisu hamutuk ho militár, Polísia ne’e, sivil tanba sira-nia dignidade ne’e militár servisu ho militár no militár servisu fali ho polísia ne’e sira mós laiha dignidade. Koloka F-FDTL iha fronteira aban-bainrua funu karik nia maka sala, maibé nia mós fi’ar katak forsa rua ne’e sei servisu hamutuk hanesan maun-alin.
“Koloka iha ne’ebá aban-bainrua sai funu karik, ha’u maka sala, fó sala ba ha’u, mas ha’u fiar katak laiha funu ida pelu kontrariu forsa rua ne’e sei servisu hamutuk di’ak liu i sira sei hamutuk hanesan maun alin ne’e ha’u fiar.
La signifika forsa iha ne’ebá ne’e ilegais laiha ilegais, sempre iha enkuantu la hatene jere fronteira ne’e ilegais sempre iha, mas la’os forsa mesak Polísia forsa sira kompleta malu iha fatin hotu-hotu, tantu iha defeza externa tantu iha seguransa interna rua ne’e tanke kompleta malu”, nia deklara.*Jos
