Taur: MG Sei Tun Ba Munisípiu Halo Kampaña Vasinasaun
Naunil Media (Dili), Primeiru Ministru (PM) Taur Matan Ruak informa, Prátikamente membrus Governu hotu-hotu, sai ba Munisípiu atu halo kampaña vasinasaun, kritérius maka membru Governu ne’e husi Munisípiu ne’ebé nia sei fila ba nia Munisípiu rasik.
“Ha’u mós informa ba PR katak, iha kampaña vasinasaun ne’e prátikamente membrus Governu hotu-hotu sai hotu ba Munisípiu sira, i kritérius ida ke ha’u husu kada membru Governu iha Munisípiu ida nia oan, nia bá fali iha ne’ebá i sira ne’ebé la’os depois ita halo kobertura, Bobonaru nia oan fila ba Bobonaru, Baucau nia oan fila ba Baucau”,Xefe Governu hato’o lia hirak ne’e ba Jornalista, hafoin remata enkontru semanál ho Prezidente Repúblika (PR), Francisco Guterres “Lú Olo” iha Rezidensia Farol, Kinta, (30/09).
PM hatutan, intimidade ne’e iha relasaun emosionál ho populasaun sira nia bele halo kampaña husu no apela ba inan-aman, para partisipa di’ak liu tan iha kampaña vasinasaun ne’e. Timor-Leste iha esperiénsia kombate Covid-19 ne’e primeira faze no segunda faze, nune’e agora dadaun kazu tun ona ne’e aproveita halo kampaña vasinasaun ne’e di’ak liu.
“Hanesan ita bo’ot sira hatene iha ita-nia esperiénsia kombate Covid-19 ne’e, ita liu tiha ona faze rua ida sira bolu primeira faze ke nia sae nia tun, nia tun tiha sa’e fila-fali, segunda faze agora tun fali ona entaun tun ne’e ita aproveita para halo kampaña para kuandu nia sae fali ita aperta mós ita hatene katak, ita iha espasu ida ke halo aproveitamentu liu-liu ba iha kampaña vasinasaun”, Taur esplika
Nia hateten, kampaña vasinasaun ne’e importante loos, tanba Governu agora prepara hela planu para normalizasaun, mas planu normalizasaun ne’e nia minímu ezizi ke populasaun sira pelumenus a nivél Nasionál karik nivél monisipal nia tenke atinji 70 ka 80 % vasina
“Ita seidauk iha nivél Nasionál konta primeira faze segunda faze foin 50 i tall %, só Dili de’it maka primeira doze ne’e atinzi 60 i tall% segunda doze ne’e ultrapasa 70% Dili di’ak loos, Dili maka atinzi uluk 80% naturalmente nia maka ba uluk normalizasaun enkuantu sira seluk ne’e hanesan dansa uituan, tanba ita-nia kampaña vasinasaun seidauk makaas”, nia dehan
Taur salienta, enkontru semanál ho Prezidente Repúblika mós PM aprezenta konaba serka sanitária sira hanesan hasai serka sanitária, liu-liu Dili embora kazu Covid-19 sei besik atus walu resin mas hasai para bele ajuda kampaña vasinasaun.*Jos
