Depois Ferias Judisial, Agora Seidauk Fulan Servisu Tribunal La’o Normál
Naunil Media (Dili), Prezidente Tribunal Rekursu (PTR), Deolindo dos Santos hateten depois Ferias Judisial ne’ebé antes ne’e hotu iha 15 Setembru tó agora seidauk fulan ida maibé servisu tribunal sira la’o normál
Líder orgaun Judisial hato’o lia hirak ne’e ba jornalista sira hafoin remata enkontru ho Prezidente Repúblika (PR), Francisco Guterres “Lú-Olo” iha palásiu Prezidente Nicolau Lobato Bairru Pite, Tersa, (05/10).
“Runiaun ohin ne’e ha’u halo ho Prezidente Repúblika depois de feriadu judisial ne’ebé ke hotu iha dia 15 Setembru entaun ita komesa fali servisu ne’e iha dia 16 Setembru tó ohin loron 5 Outubru mais ou menus ita halo servisu seidauk tó fulan ida ita komesa la’o normál ida mak informasaun ne’ebé mak ha’u mai hato’o ba Prezidente Repúblika”, dehan PTR Deolindo dos Santos.
PTR hatutan durante ferias nia laran servisu la’o mas la’o lahanesan bai-bain tanba Juiz sira goja sira nia direitu ba ferias durante loron 25 nia laran, entaun prosesu sira ne’ebé la’o ne’e prosesu sira tuir lei hateten tantu mesmu hanesan ne’e mós prosesu sira ne’ebé urjenti ne’e kuaze iha desizaun hotu no la’o normál
Deolindo hateten daudaun ne’e ba fali ona servicu Judisial normál entaun husi ne’e ba oin mak bele hatene iha mudansa servisu ruma kona-ba servisu depois Ferias ka lae.
“Agora mak ita fila-fali ba situasaun ne’ebé ke hanesan bai-bain Juiz sira komesa haree fali servisu tomak hotu husi prosesu sira ne’ebé Juiz sira kada ida-idak iha entaun husi fulan ida ne’e ba oin mak ita bele hatene ho forma ne’ebé mais kompletu katak iha mudansa ruma kona-ba servisu depois de feriadu ne’e ou lae”, Tenik Deolindo.
Prezidente Tribunal Rekursu ne’e mós esplika tanba Informasaun sira ne’ebé iha agora ne’e informasaun sira ne’ebé antes de ferias, ne’ebé buat balun seidauk kosta iha ne’e, entaun iha loron 15 fulan Setembru ba oin komu agora iha reuniaun iha inisiu de Outubru entaun seidauk kompletu di’ak mas nu entantu servisu hotu la’o di’ak.
“Agora informasaun ne’ebé mak ha’u iha ne’e hanesan ohin dehan katak informasaun sira ne’ebé fulan hirak liu ba antes ferias no durante ferias iha Agostu nia laran mas seidauk kompletu ne’e mais ou menus iha evolusaun pozitivu”, esplika Prezidente Tribunal Rekursu
Nia dehan, durante ferias númeru kazu nia la fixu mas nu entantu julgamentu sira hala’o de’it ba prosesu sira ne’ebé ke urjenti mak hanesan krime sira ne’ebé iha prezu ou sumariu atu halo primeiru interogatoriu sumariu ba julgamentu sira ne’ebé menus husi tinan lima (5)
Iha enkontru ne’e Prezidente Repúblika mós apresia ho diak servisu tribunal sira no enkoraja nafatin para atu bele servisu di’ak liu tan, atu nune’e bele fornese justisa ne’e di’ak liu tan ba populasaun no sidadaun sira. *Jos
