Lere: Membru F-FDTL Foun Ida Husu Resignasaun
Naunil Media (Dili),Xefe Estadu Maior Generél das Falintil Forsa Defeza Timor-Leste (F-FDTL) Tenente Generál Lere Anan Timur hateten, membru F-FDTL foun ida desiste, tanba latoman situasaun militar, husu atu resigna an.
Tenente Generál hato’o lia hirak ne’e ba Jornalista bainhira remata enkontru ho Prezidente Repúblika (PR) Francisco Guterres “Lú-Olo” iha palásiu Prezidente Nicolau Lobato Bairru Pite, Kuarta, (6/10).
“Ita labele mai halimar fali ho instituisaun ida ne’e, la’os asulear ka la’os morador, ohin tama aban sai hanesan ne’e ladiak, mas ha’u hanoin katak ate agora ha’u rona ida-de’it maka husu ninian rejignasaun tanba nia laauguenta sistema militár”, dehan Tenente Jeneral Lere Anan Timur
Tenente Jeneral hatutan, to’o agora hotu-hotu di’ak maibé ida maka desiste, tanba ne’e sei hasai diretiva ida ba rekrutamentu sira durante loron tolu-nulu (30) nia laran bele resigna-an.
“Ate agora hotu-hotu di’ak, ida maka deziste tanba latoman, latoman situasaun militár ne’e maka ha’u sei hasai diretiva ba rekrutamentu hotu-hotu dentru trinta (30) Dias, se labele bele dezisti depois dia trinta (30) ba leten o mate de’it ona iha forsa nia laran”, Lere esplika.
Lere akresenta, seidauk to’o fulan ida, instrusaun seidauk la’o entaun bele avansa fali ida para kompleta nafatin 600 ne’e buat ne’e akontese iha fatin hotu-hotu, ate propriu padre sira mós rejigna-an. Rejime voluntáriu ne’e kuandu hakarak bele resigna-an ne’e ba nia la’os kestaun.
Nia informa, ida halo resignasaun ne’e mane husi Lospalos, idade 20 i tal, lakonsidera nia hanesan militár mas ne’e voluntariu, tama voluntáriu, sai voluntáriu mas ne’e desizaun ida ba joven sira seluk, se maka labele, rekuza kedas prinsipiu labele mai okupa fali ema seluk nia fatin.
Iha enkontru ne’e Prezidente Repúblika mós husu ba Tenente Jeneral katak, tenke haree didi’ak forsa sira kona-ba disiplina sira-nia responsabilidade halo oinsá para bele kumpri didi’ak sira-nia knaar nu’udar lutu Nasaun nian.*Jos
