PR “Lú-Olo” Diplomata Tenke Koresponde Nesesidade Interna País

Naunil Média (Dili), Prezidente Repúblika (PR), Francisco Guterres “Lú-Olo” hateten Asaun Diplomata sira tenke Koresponde Nesesidade Interna País nian.

Chefe Estadu ható lia hirak ne’e liu husi diskursu bainhira fo posse Embaixador Timor-Leste ba País lima ne’ebé hala’o iha palásiu Prezidente Nicolau Lobato Bairru Pite, Sexta, (08/10).

“Asaun diplomátika,dezenvolve iha país ida-idak, tenke korresponde ba nesesidades interna ita-nia país. País investe iha diplomasia fatia ida razoavel husi orsamentu jerál Estadu. No sai óbviu katak ida ne’e ejize autór sira- diplomatas, fó enfaze ba Embaixadór sira atu kumpri sira-nia misaun”, dehan PR “Lú-Olo”.

“Lú-Olo” hatutan nomeasaun ba Embaixadór sira hatudu konfiansa Prezidente Repúblika nian no Governu ne’ebé fó empossada. Prezidente Repúblika fiar katak ho orientasaun husi Ministériu Negosiu Estranjeiru embaixadór sira sei esplora oportunidade iha país ida-idak ba benefisiu Timor-Leste. 

Embaixadór Juvêncio de Jesus Martins, diplomata karreira, uluk sai Embaixadór Timor-Leste nian ba Malásia, no mós akreditadu ba Vietnam no Myanmar. Ikusliu sai Embaixadór Timor-Leste nian ba Filipina. Embaixadór ezerse funsoins diplomátikas iha Indonézia.

Embaixadór Jorge Trindade Neves de Camões, diplomata karreira. Sai jovens diplomata na’in-tolu dahuluk nian iha Timor-Leste, destaka iha Jakarta, Indonézia, hafoin referendu iha 1999. Ezerse funsoins oioin iha MNEC no funsoins servisu periférikus esternus. Sai Sekretáriu Jerál MNEC ba dala-rua. Nomeadu ba Embaixadór Timor-Leste nian iha Vietnam, ba tinan-haat. No iha koñesimentu klean ba assuntus ASEAN nian.

Embaixadór Filomeno Aleixo da Cruz, sai Embaixadór Timor-Leste nian ba Japaun husi 2016-2019. Sai Vise-Ministru Administrasaun Estatal husi I no II Governu Konstitusionál. Formadór ba kuadrus, konsultór no fasilitadór ba asaun formasaun iha Institutu Repúblikanu Internasionál husi Estadus Unidus.

Embaixadór Francisco Miranda Branco, hahú envolve iha atividade polítika ho otas nurak tebes hafoin revolução dos cravos akontese iha Portugal 1974. Kompleta nia estudu iha Liceu  Dr. Francisco Machado no hahú serbisu nu’udar funsionáriu públiku ihah Serviços de Planeamento Económico e Estatística, Provinsia Ultramarina Timor. Desde 2001 nu’udar Deputadu asume responsabilidade oioin.

Embaixadora Joana Veneranda Amaral, envolve barak iha kampu edukasaun nian. Envolve iha projetus ne’ebé iha relasaun ho Timor-Leste no Japaun, iha ámbitu Centro Cultural Timor-Leste-Japão. Sai profesora iha eskola sekundária Fuiloro no Diretora Administrasaun no Jestora Rekursu Korporativas ba empreza Konsultadoria.

Ba Embaixadór na’in-lima ne’ebé simu posse, Prezidente Repúblika mós dezeja susesu ba funsaun nu’udar reprezentante diplomátika Timor-Leste nian.

Iha 7 outubru 2021, liuhusi Dekretu Prizedente Repúblika,  Prezidente Repúblika nomea Embaixadóres Timor-Leste ba  Tailandia, Béljika, Indonézia, Mosambike no Malásia.

Embaixador sira ne’ebé hetan posse husi Prezidente Repúblika mak embaixadór Timor-Leste nian ba Reinu Tailandia Juvêncio de Jesus Martins, Reino Béljika Jorge Trindade Neves de Camões, Repúblika Indonézia Filomeno Aleixo da Cruz, Repúblika Mozambike Francisco Miranda Branco no ba Malasia Joana Veneranda Amaral.*Jos