Lú-Olo: Prezensa MAE-ONU, Importante Hametin Eleisaun
Naunil Média (Dili), Prezidente Repúblika (PR), Francisco Guterres “Lú-Olo” hateten Prezensa Misaun Akosellamentu Eleitoral (MAE), ho Organizasaun Nasoens Unidas (ONU) nian, importante atu hametin Eleisaun Jerais ne’ebé iha Pandemia nia laran.
Xefe Estadu hato’o lia hirak ne’e bainhira halo audensia ho Ofisiais husi Misaun Akosellamentu Eleitoral ONU ne’ebé hala’o iha palásiu Prezidente Nicolau Lobato Bairru Pite, Segunda, (18/10).
“Prezensa Misaun Akonsellamentu Eletorál ONU importante atu hametin eleisaun jerais ne’ebé transparante no iha lejitimidade demokrátiku, liuliu iha situasaun pandemia Covid-19 nia laran”, Dehan PR “Lú-Olo”
Xefe estadu hatutan, teknikamente Sekretáriu Téknika Administrasaun Eleisaun (STAE) no Comissáo Nacionál de Eleição (CNE), mak sei tau matan ba eleisoaun jerais no Prezensa Misaun Akonsellamentu Eletoral ONU nian importante tebes tanba eleisaun jerais sei hala’o iha pandemia Covid-19 nia laran.
PR hateten, eleisaun nu’udar mekanismu importante ba sidadaun ida-idak ezerse sira nia direitu liu husi votus hodi deside se mak atu ukun no partidu polítiku sira ne’ebé manán eleisaun tenke implementa sira nia kompromisu polítiku.
Iha biban ne’e Sekretariadu ONU Divizaun Asistensia Eleitoral, Zoran Trajkovski, agradese ba Xefe estadu, ne’ebé depozita ona fiar ba ONU hodi apoiu eleisaun iha Timor-Leste (TL)
“Husi Sekretariadu ONU nian hodi serbisu ba Divizaun Asisténsia Eleitoral husi Departamentu ba Assuntu Polítiku no Hari-Dame, agradese tanba ba PR depozita fiar ba Nasoins Unidas no iha kompromisu atu apoiu prosesu eleisaun iha TL”, tenik Zoran Trajkovski
Zoran hatutan Nasoins Unidas sei la servisu mesak, maibé sei servisu hamutuk ho parte hotu-hotu, ho ajensia sira no sosiedade sivíl.
“isaun Akonselamentu Eletoral ONU nian hala’o nia serbisu iha TL husi loron 7 to’o 21 fulan Outubru tinan 2021, ho objetivu hetan koñesimentu kona-ba fatores no kestoins ne’ebé sei fó impaktu ba prosesu eleisaun, identifika lakunas iha atividade téknika ne’ebé la’o hela dadaun no tuir planu, estratéjia ba prosesu mobilizasaun rekursu no fornese konsellu ba Koordenadór Rezidente ONU iha TL,” nia esplika
Nia mos dehan, depois hala’o nia misaun iha TL haree prosesu pozitivu balun no rona dezafiu tekniku husi prosesu konsulta.
Ikus liu nia mós aprezenta felisitasaun husi Sekretáriu Jerál ONU António Guterres nian ba Prezidente Francisco Guterres “Lú-OLo”.*Jos