Posibilidade Tinan Oin UNTL Simu Estudante 3.000
Naunil Média (Dili), Universidade Nasionál Timor Lorosa’e (UNTL), posibilidade iha ano letivu 2022 sei simu estudantes foun Hamutuk 3.000, tuir vagas ne’ebé universidade prepara ho númeru.
“Ami prepara ona vagas ne’ebé se lasala ho númeru 3.000 i tall, maibé sei iha diskusaun, ne’e ami hare’e tuir kapasidade salas de aula no mós númeru profesores ne’ebé mak iha entaun, ami propoin pur volta de 3.000 i tall estudantes”, Dehan Reitor UNTL, João Soares Martins, ba jornalista, hafoin remata hasoru malu, Prezidente Republika (PR), Francisco Guterres “Lú-Olo” iha Palásiu Prezidente, Tersa, (19/10).
Reitor UNTL ne’e haktuir, kona-ba estudante foun atu simu iha tinan oin ne’e sei liu husi Reuniaun ensinu superior, ne’ebé ekipa konjunta Lidera husi ministeriu ensinu superior Siensia no Kultura (MESSK).
“Diskusaun lao hela, ita hatene muito bem katak, simu estudante foun ne’e liu husi reuniaun asesu ensinu superior ne’ebé ekipa konjunta lideradu husi MESSK, UNTL hola parte iha prosesu ne’e hotu, ne’ebé prosesu la’o hela, Mas ha’u fiar katak ba guvernu parese iha tan aumentu balun ke ami sei negosia,” Esplika Reitor UNTL.
João afirma, Ho MSSK atu hare’e númeru final, kuandu prosesu ne’e to’o ona iha Janeiru 2022 mak haree.
Nia deklara, dezafius ne’ebé universidade hasoru mak númeru profesores tanba kapasidade estudante bo’ot liu profesores.
“Númeru profesores ne’ebé ita sura karik estudante hamutuk 40.000 mill, rezistu profesores 400 kuaze ema ida hanorin profesor ida hanorin ema 100 ne’e tuir loloos labele, ida tenke hanorin 25 ate 30 ne’e rasional”, Tenik Nia
dezafiu sira ne’e universidade no nasaun tomak hasoru tanba ne’e sira mós aprezenta ba PR, nune’e universidade hakarak aposta ba iha kualidade maibé limitasaun sira ne’e.
Tanba ne’e sira mós hein katak prosesu dezenvolvimentu liu-liu konstrusaun ba infrastrutura sei bele kontinua lao nafatin, husu guvernu no mós parseiru sira bele apoiu nafatin nune’e bele atinzi kualidade ensinu superior ne’ebé Timor-oan mehi.*Jos
