SEKOMS: Kapasitasaun Mídia Importante, Hadi’ak Kualidade Produtu Jornalístiku

Naunil Media (Dili), Sekretáriu Estadu ba Komunikasaun Sosiál (SEKOMS), Merício Juvinal dos Reis “AKARA”,  afirma SEKOMS kontinua investe iha kapasitasaun rekursu umanu iha área jornalizmu hodi hadi’a kualidade produtu jornalístiku iha rai-laran.

Merício Juvinal dos Reis “AKARA”, hato’o lia hirak ne’e bainhira halo abertura ba formasaun kona-ba Papel no Knaar Rádiu Komunidade ba Empoderamentu no Dezenvolvimentu, ne’ebé organiza husi Diresaun Nasionál Desenvolvimentu Mídia Lokál (DNPDML)-SEKOMS, iha salaun Otel JL vila, tersa, (09/11).

Governante ne’e afirma, mídia nu’udar pilar importante ida iha prosesu demokrátiku. tanba ne’e, tenke jere no utiliza mídia ho di’ak, atu nune’e ema hotu iha direitu hodi hetan informasaun loos no kredível.

“AKARA” mós husu ba mídia sira tenki asegura Liberdade Imprensa iha kualkér indivídu, labele halo intervensaun iha konsellu redasaun servisu, tuir kódigu étika jornalizmu nian no tenki halo revizaun ba notísia ka konteúdu jornalístiku sira molok halo publikasaun atu nune’e ema hotu tenki asesu ba informasaun ne’ebé mak pozitivu.

Iha biban ne’e, Ezekutivu ne’e mós enkoraja formandu sira atu aproveita didi’ak formasaun ne’e atu nune’e bele hasa’e koñesimentu iha área jornalizmu nian.

AKARA husu ba jestór rádiu komunidade sira atu utiliza orsamentu ne’ebé alokadu ona hodi hadi’a kualidade infraestrutura mídia estatál ne’e nian. 

Iha fatin hanesan, Diretór Nasionál Promosaun Dezenvolvimentu Mídia Lokál, José das Costa, hateten formasaun ne’e ho objetivu atu moderniza rádiu komunidade sira iha parte publisidade iha website online no oinsá rádiu komunidade sira bele kontinua garante kualidade publikasaun ba konteúdu jornalístiku sira ho utillizasaun lian Tétun ne’ebé padronizadu.

José da Costa enkoraja mós formandu sira atu  partisipa formasaun ne’e ho di’ak hodi hetan experiénsia ruma husi oradór sira nune’e bele hala’o knaar ho di’ak liután.

Formasaun ne’ebé hala’o durante loron rua ne’e partisipa husi Editór no jornalista husi rádiu komunidade sira ho oradór husi Institutu Nasionál Linguístiku (INL), STL Media Group no Timor Post. Husi Media Sekoms