“BI-BRANI” Halo’ot Iha Jardim Dos Herois Da Pátria.
Naunil Média (Dili), Prezidente Repúblika (PR), Francisco Guterres Lú-Olo, liu husi Dekretu Prezidente Repúblika ho númeru 99/2021, 10 Novembru, dekreta atu Estadu fó ondras fúnebre no hakoi Paulina Ribeiro “Bi-Brani”, iha Jardim dos Herois da Pátria iha Metinaro.
Liu husi Dekretu Prezidente Repúblika ne’ebé Naunil Média asesu iha média Prezidensial Kinta (11/11), hateten Konstituisaun rekoñe no Valoriza rezisténsia povu Maubere nia kontribuisaun ba luta Independensia nasionál.
Liu husi Dekretu Prezidente Repúblika ne’ebé publika iha Jornal da República hateten Konstituisaun konsagra rekoñesimentu no valorizasaun ba rezisténsia sekular Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál.
Lei kona-ba Estatutu Kombatentes Libertasaun Nasionál reafirma vontade atu fó omenaje ba esforsu sira ne’ebé manifesta husi Kombatentes Libertasaun Nasionál iha luta ba Independénsia Nasionál.
Haree ba kontribuisaun ba Luta Libertasaun Pátria, Comissão de Homenagem, Supervisão de Registos de Recursos autoriza Paulina Ribeiro “Bi Brani” iha direitu atu hetan ondras fúnebre no hakoi iha “Jardim dos Herois da Pátria, iha Metinaro, nu’udar Kombatentes Libertasaun Nasionál.
Bi-Brani nu’udar membru OPMT iha zona 28 Novembru , Sektór Sentru Leste, Iha 1978 hafoin zonas libertadas rahun, tun mai vila. Iha tinan 1981 hahú envolve iha rede klandestina ho ligasaun Adjunto Solesole. Iha tinan 1983, hafoin Levantamentu Kraras, Bi-Brani deside reziste iha ai-laran kontra okupasaun Indonézia hamutuk ho Komandante Ular-Rihir no sira seluk.
Nu’udar membru OPMT, Bi-Brani koloka iha região IV, iha parte Manufahi no Manututo. Iha 1984, Bi-Brani aprende lee no hakerek iha ai-laran hamutuk ho membru OPMT no kuadru polítiku no militár sira seluk.
Iha 1999, depois maioria povu hili ukun rasik-an, Bi-Brani foin tun mai vila moris hamutuk ho nia família sira.*Jos
