CNE, STAE Iha Preparasaun Di’ak Ba ELPRE Tinan Oin

Naunil Media (Díli), Komisaun Nasionál Eleisaun (CNE) no Sekretariadu Tekníku Administrasaun Eleitoral (STAE) iha preparasaun di’ak ba eleisaun prezidensiál ne’ebé sei realidade da iha tinan oin.

Lia hirak ne’e ható husi Ministru Administrasaun Estatal (MAE) Miguel Pereira de Carvalho ba jornalista hafoin sorumutuk ho Xefí estadu iha palásiu Prezidensiál Nicolau Lobato Bairru Pite, Segunda, (22/11).

“Preparasaun ba eleisaun la’o ho di’ak tebes iha tempu ida agora dadaun ne’e orgaun eleisaun Eleitoral tantu Sekretariadu Tekníku Administrasaun Eleitoral (STAE) no Komisaun Nasionál Eleisaun (CNE) realiza namanas hela resenseamentu Eleitoral no mós aktualizasaun baze de dadus rai laran no mós iha rai li’ur ke sei termina iha dia 14 Janeiru 2022”, Dehan MAE Miguel Pereira de Carvalho

Membru guvernu ne’e hatutan dadaun ne’e rezista ona eleitores foun balun aktualiza eleitores lubun ida entre-tantu STAE hanesan orgaun ne’ebé mak ezekuta  eleisaun halo preparasaun lojistikus barak tebes atu bele garante eleisaun prezidensiál ne’e sei realiza iha tinan oin.

Miguel hateten konserteza STAE no CNE iha tempu balun sei halo diskusaun no karik prezidente Repúblika Konvida karik sira prepara antes ona.

“Ne’ebé ita nia planu husi STAE konserteza iha diskusaun ho CNE para tempu balun iha fulan Janeiru bele ható proposta halo diskusaun ida depende wainhira Prezidente Repúblika Konvida hodi orgaun ne’e informa kona-ba sira nia preparativus”, Tenik Miguel

Nia dehan tuir lei prezidente Repúblika rasik mak sei determina data ida para atu realiza eleisaun maibé orgaun ba eleisaun nian hanesan STAE preparadu para atu realiza eleisaun iha tinan oin. *Jos