Depois Dialogu PR Lú-Olo Konvida MAP
Naunil Media (Díli), Prezidente Repúblika Francisco Guterres “Lú-Olo” antes ne’e halo dailogu ho povu Manufahi no Ainaro ohin konvida Ministeriu Agrikultura no Peska atu pasa informasaun relasiona ho preokupasaun povu nian.
Lia hirak ne’e ható husi Ministru Agrikultura no Peska Pedro dos Reis ba jornalista hafoin sorumutuk ho Xefí estadu iha palásiu Prezidensiál Nicolau Lobato Bairru Pite, Tersa, (23/11).
“Enkontru ida ohin akompaña rezultadu prezidente Repúblika nian dialogu iha Manufahi no Ainaro nian tanba ne’e mak prezidente Repúblika Konvida ministeriu Agrikultura no peskas mai pasa tan informasaun balun relasiona ho pergunta ne’ebé mak durante dialogu iha Terenu”, Dehan MAP Pedro dos Reis.
Membru guvernu ne’e mós esplika problema barak tanba momentu ne’ebá mós MAP akompaña no fo responde balbalun no ohin halo kompletu liu tan para Prezidente Repúblika bele intende ho di’ak.
“Problema ita hatene iha inundasaun foun lalais estragus sasán barabarak irigasaun kuaze aat hotu ho limitasaun barabarak kafé ne’ebé mak kuaze mate hotu ona liga ba animais ne’ebé ita fahi mós mate hotu ona”, Esplika membru guvernu ne’e.
Pedro hatutan, Polítika ministeriu Agrikultura no peskas nian mak atu hasa’e produsaun iha rai laran maibé presiza tenke investe
“Polítika MAP nian hanesan ohin ha’u hateten tenke hasa’e ita nia produtu iha rai laran maibé iha fator barabarak ne’ebé mak tenke halo tenke investe osan hadia eskema irigasaun manual espera katak irigasaun Galata ho Laivai Tenderizasaun loke ona ba futuru atu atinzi 131.000 komsumu nasionál ne’e ita bele priense hela”, Tenik Pedro.
Nia dehan, Dadaun ne’e ministeriu Agrikultura no peskas halo irigasaun 8 ne’ebé re-apropria no inklui mós irigasaun 2 Galata ho Laivai ninian re-apropria 8 irigasaun foun rua no Irigasaun ne’ebé mak agora dadauk hadia mak iha Maliana II, Oebaba, Larisula, iha irigasaun kiik oan iha Kasa ninian, Paulara, Halihou, inklui Laivai ho Galata nian.
Iha enkontru ne’e Prezidente Repúblika mós fó Mensajen ba MAP prioridade tenke hasa’e produtu rai laran tanba iha área potensial iha 80.000 resin, maibé ba haré de’it foin dezenvolve 30.000 de’it entaun presiza investimentu iha MAP, Nia hakotu. *Jos
