FEATUREDIkus LiuNewsPolitika

Ekipa OMK Aktualiza Servisu Adezaun Ba PR Lú-Olo

Fahe Tutan

Naunil Media (Díli), Ekipa husi Organizasaun Mundiál Komérsiu (OMK) aktualiza servisu adezaun nian ba iha xefí estadu tanba Timor-Leste hetan ona kalendariu indikativu atu bele kumpri.

Lia hirak ne’e ható husi Ministru Koordenadór Asuntu Ekonómika no Chefe Negosiador Adezaun Timor-Leste ba Organizasaun Mundiál Komérsiu Joaquim Amaral ba Jornalista hafoin remata hasoru malu ho Prezidente Repúblika Francisco Guterres Lú-Olo iha palásiu Prezidensiál Nicolau Lobato Bairru Pite, Tersa, (23/11).

“Ita aktualiza ba Prezidente Repúblika kona-bá servisu ne’ebé ita halo ona ho servisu sira ne’ebé sei halo tan tempu sira oin mai tanba Timor-Leste hetan ona kalendariu indikativu atu bele halo tuir atu bele kumpri nune’e tempu sira ne’ebé Sekretariadu Organizasaun mundiál komérsiu mai Timor Leste no Timor-Leste bele halo tuir no kumpri tuir tempu ne’ebé iha”, Dehan xefí Negosiadór Joaquim Amaral.

Xefí Negosiadór ne’e mós hatutan Servisu ne’ebé halo ona mak ekipa submete ona dokumentus imput negosiasaun nian kona-ba Beis no servisu no ekipa mós simu ona imput husi estadu membru sira no dadaun ne’e prepara hela atu resposta no resposta balun fó tiha ona.

Membru guvernu ne’e mós hateten dadaun iha hela servisu interna nune’e bele identifika planu no lejislasaun sira no armoniza Regra sira ne’ebé OMK fó ba Timor-Leste

“Nune’e mós ita halo hela ita nia servisu interna hodi identifika ita nia planu lejislasaun sira ne’ebé ita presiza atu halo hodi armoniza hodi aliña ho regras no prosedimentu sira ne’ebé Organizasaun mundiál Komérsiu fo mai ita”, Tenik membru guvernu ne’e.

Joaquim hateten servicu sira dadaun ne’e la’o namanas hela mak tanba ne’e ekipa mai aktualiza servisu sira ne’e ba Prezidente Repúblika no hetan orientasaun hodi suporta ekipa ne’e bele halo servisu ba oin

Nia dehan orientasaun no informasaun ne’ebé suporta husi orgaun soberania sira hanesan Prezidente Repúblika, prezidente Parlamentu Nasionál nune’e mós sosiedade sivil setor privadu sira hotu-hotu tenke hatene faze sira ne’ebé atu halo nune’e bele lori Timor-Leste integra iha sistema bo’ot organizasaun mundiál komérsiu nian.

Tanba ne’e nia mós husu apoiu politika ne’ebé presiza tebe-tebes atu hotu-hotu hatene prosesu sira ne’e, nune’e ekipa sira halo servisu ho espíritu ne’ebé boot katak, iha apoiu ne’ebé aselera prosesu ne’e

Iha enkontru ne’e Prezidente Repúblika mós fo nia suporta no orientasaun aleinde kumpri kalendariu, ekipa mós tenta haree identifika situasaun ríl ne’ebé Timor-Leste iha ho sira nia orgaun sira no sosiedade no elementu sira ligasaun direita ho ekonómia oinsá bele tau matan  liuliu ministeriu sira ne’ebé involve iha prosesu adezaun ne’e nune’e bele identifika dezafius no potensialidade ne’ebé Timor-Leste iha. *Jos

Leave a Reply

Your email address will not be published. Required fields are marked *