PR Sei Prezide Selebrasaun 28 Novembru Iha Baucau
Naunil Media (Díli), Prezidente Repúblika (PR) Francisco Guterres “Lú-Olo” sei Prezide serimónia selebrasaun loron proklamasaun independensia Timor-Leste 28 Novembru ba dala 46 iha Munisípiu Baucau.
Lia hirak ne’e ható husi Ministru Administrasaun Estatal (MAE) hanesan mós Prezidente Komisaun organizadora Miguel Pereira de Carvalho ba jornalista hafoin sorumutuk ho Xefí estadu iha palásiu Prezidensiál Nicolau Lobato Bairru Pite foin lalais ne’e.
“Prezidente Repúblika ohin informa katak preparadu para atu ba Prezide serimónia hasa’e Bandeira”, Dehan MAE Miguel Pereira de Carvalho.
Iha biban ne’e Prezidente Komisaun organizadora ne’e mós informa atividade sira ne’ebé mak sei hala’o iha amibitu selebrasaun 28 Novemvru ba iha Xefí Estadu.
“Ohin ha’u mai hanesan prezidente komisaun organizadora ba selebrasaun dala 46 proklamasaun Repúblika demokrátika Timor-Leste hodi aktualiza preparasaun serimónia sira 28 Novembru nian iha tinan ida ne’e”, Katak prezidente komisaun organizadora
Membru guvernu ne’e mós informa ba públiku tomak katak tema husi selebrasaun 28 Novembru tinan 2021 nian mak A União e A Luta Conjunta Para A Vitória do Todos no tema ne’ebé mak Komisaun organizadora hili ne’e para atu husu ba Timor oan sira hotu unidus iha luta ida ne’e no mós unidus para atu manan.
MAE hatutan aktividade 28 Novembru iha ne’ebá sei realiza hasa’e Bandeira iha Baucau no Prezide direitamente husi Prezidente Repúblika no serimónia ne’e mós sei iha kondekorasaun
“Kondekorasaun ne’e sei fo ba ema kuaze 50 pesoas ba veteranus sira tantu ita tenke haree didiak dekretu Prezidensiá ne’ebé mak prezidente Repúblika sei hasai no sei haree klaru sé se mak kondekoradu sei hala’o durante hasa’e Bandeira”, Tenik MAE
Miguel hateten, Antes tama ba 28 Novembru maibé iha loron 27 Novembru mós sei realiza misa agradesementu iha Igreja Baucau vila wainhira misa remata konvidadus hotu no sarani sira sei ba Jardim Dos Herois Fatumaka hodi tau aifunan iha ne’ebá.
Nune’e mós serimónia hatun Bandeira iha tuku 4:00 loraik sei Prezide husi Prezidente Parlamentu Nasionál. *Jos
