Tinan Oin Atauru Sai Ona Munisipiu
Naunil Média (Dili), Ministru Administrasaun Estatal (MAE) Miguel Pereira de Carvalho informa, tuir lei hahú iha (1/012022), Postu Administrativu Ataúru, sai ona Munisípiu ho nia administrasaun ketak.
” Tuir Dekretu lei ida ne’ebé mak preve kompetensia ba Munisípiu Ataúru rasik, hare’e mós regras para ita atu hili administrador Munisípiu Ataúru, no tuir lei hahú 1 Janeiru Ataúru hahú sai hanesan Munisípiu ida no ninia administrasaun mós tenke inisia kedas hahu husi 1 Janeiru 2022″, Dehan Ministru Estatal Miguel Pereira de Carvalho ba Jornalista sira, bainhira enkontru ho Prezidente Repúblika Francisco Guterres Lú-Olo iha palásiu Prezidensiál Nicolau Lobato Bairru Pite, Segunda, (22/11).
Membru guvernu ne’e mós fiar katak iha tempu ruma dekretu Lei ne’ebé estabelese administrasaun aprovadu nune’e governu bele nomeia ona administrador ida ba Munisípiu Ataúru
” Ha’u fiar katak iha tempu ruma iha fulan Dezembru nia laran depois dekretu lei ne’ebé mak estabelese administrasaun munisipiu Ataúru ne’e aprovadu ita bele nomeia ona administrador ida ba Munisípiu Ataúru”, tenik membru Governu ne’e
Miguel hateten atu estabelese administrasaun Ataúru nune’e administrasaun Ataúru bele funsiona tuir dekretu lei númeru 3/2016.
Nia dehan, Dadaun ne’e preparasaun la’o di’ak tanba Alterasaun dala rua ona ba lei Divizaun administrativa no antes ne’e mós Konsellu Ministru aprova ona dekretu Lei ida kona-ba estabelese administrasaun Ataúru
“Preparasaun la’o di’ak tebes hanesan ita boot sira hatene Alterasaun dala rua ba lei Divizaun administrativa nian kria ona Munisípiu Ataúru no semana kotuk konsellu Ministru mós aprova ona dekretu Lei ida hodi estabelese administrasaun Ataúru”, nia tenik.*Jos
