Tuir Lei Hahú 1 Janeiru Ataúru Sai Ona Munisípiu Ida
Naunil Media (Díli), Ministru Administrasaun Estatal (MAE) Miguel Pereira de Carvalho hateten tuir lei hahú 1 Janeiru 2022 Ataúru sai ona Munisípiu ida ho nia administrasaun mós tenke iha kedas.
“Dekretu lei ida ne’ebé mak prevee kompetensia ba Munisípiu Ataúru rasik haree mós regras para ita atu hili administrador Munisípiu Ataúru no tuir lei hahú 1 Janeiru Ataúru hahú sai hanesan Munisípiu ida no ninia administrasaun mós tenke inisia kedas hahu husi 1 Janeiru”, Dehan Ministru Estatal Miguel Pereira de Carvalho ba jornalista hafoin sorumutuk ho Prezidente Repúblika Francisco Guterres “Lú-Olo” iha palásiu Prezidensiál Nicolau Lobato Bairru Pite, foin lalais ne’e.
Membru guvernu ne’e mós fiar katak iha tempu ruma dekretu Lei ne’ebé estabelese administrasaun aprovadu nune’e guvernu bele nomeia ona administrador ida ba Munisípiu Ataúru
“Ha’u fiar katak iha tempu ruma iha fulan Dezembru nia laran depois dekretu lei ne’ebé mak estabelese administrasaun munisipal Ataúru ne’e aprovadu ita bele nomeia ona administrador ida ba Munisípiu Ataúru”, Tenik Governante ne’e.
Miguel hateten atu estabelese administrasaun Ataúru nune’e administrasaun Ataúru bele funsiona tuir dekretu lei númeru 3/2016.
Nia dehan, Dadaun ne’e preparasaun la’o di’ak tanba Alterasaun dala rua ona ba lei Divizaun administrativa no antes ne’e mós Konsellu Ministru aprova ona dekretu Lei ida kona-ba estabelese administrasaun Ataúru
“Preparasaun la’o di’ak tebes hanesan ita boot sira hatene Alterasaun dala rua ba lei Divizaun administrativa nian kria ona Munisípiu Ataúru no semana kotuk konsellu Ministru mós aprova ona dekretu Lei ida hodi estabelese administrasaun Ataúru”, Nia hakotu. *Jos
