PTR Aktualiza Servisu Tribunal Nian Ba PR Lú-Olo

Naunil Media (Díli), Prezidente Tribunal Rekursu (PTR) Deolindo dos Santos aktualiza servisu servisu tribunal nian ba Prezidente Repúblika (PR) Francisco Guterres “Lú-Olo”.

Líder Orgaun Judisiariu ható lia hirak ne’e ba jornalista sorumutuk ho Prezidente Repúblika (PR) Francisco Guterres “Lú-Olo” iha Palásiu Prezidensiál Nicolau Lobato Bairru Pite, segunda, (06/12).

“Ha’u ohin enkontru ho Prezidente Repúblika atu aktualiza uituan kona-bá servisu tribunal nian, ne’ebé durante fulan rua tolu nia laran mak ható ba Prezidente Repúblika katak ita faze final ba tinan 2021, enprinsipiu servicu tribunal nian la’o ho di’ak ho esforsu tomak ne’ebé mak Juiz sira halo no konsellu halo entaun iha prosesu ne’ebé la’o di’ak liu tan no servisu tribunal nian la’o di’ak liu tan duké tinan hirak liu ba ne’e”, Dehan PTR Deolindo dos Santos.

PTR hatutan,  Mezmu ho problema ne’ebé tribunal hasoru maibé servisu tribunal nian di’ak liu tan no informa mós ba Prezidente Repúblika kona-bá halo nusa mak atu bele iha kapasitasaun ba Juiz, ofisiál justisa, no funsionáriu sira ne’ebé servisu iha tribunal.

Deolindo hateten iha programa balun ne’ebé iha 2021 ne’ebé preve no realiza mós formasaun balun ba Juiz no funsionáriu sira mas iha balun ne’ebé lakonsege entaun ida mak planu fali atu hala’o iha tinan oin 2022, no hanoin fali atu halo oinsá para bele iha tan Juiz balun, ne’ebé konsellu sei deside para frekuenta formasaun iha li’ur.

Nia esplika, Laiha problema karik iha Janeiru ne’e sira komesa ona sei halo faze rua ne’ebé iha tinan 2022 no ko’alia mós ho Prezidente Repúblika kona-bá problema no difikuldade ne’ebé tribunal sei hasoru,  mak falta infrastrutura falta ekipamentu trabalhu ne’ebé konsege rezolve balun ona ho orsamentu 2021 nian.

Nia dehan,  Iha orsamentu 2021 ne’e mak tribunal lakonsege rezolve entaun, ko’alia governu no Parlamentu Nasionál nune’e bele preve  orsamentu ne’ebé adekuadu para fó solusaun ba problema sira.

“Orsamentu 2021 balun ne’ebé ke ita lakonsege rezolve entaun ita ko’alia ona ho governu ne’ebé ke nu’udar Jestor ba orsamentu estadu nian no Parlamentu Nasionál atu halo nusa mak bele preve orsamentu ne’ebé adekuadu para fó solusaun ba problema hirak ne’ebé iha 2022 nian”, Nia esplika.

Nia mós relata ba Prezidente Repúblika katak andamentu ba prosesu la’o normál ona, ne’e signifika katak prosesu lubuk ida mak deside iha primeira instadia sira no mós iha iha tribunal rekursu rasik.

Iha enkontru ne’e Prezidente Repúblika mós fó apresiasaun pozitu,  no husu ba tribunal sira bele funsiona ho di’ak nafatin, atu nune’e bele la’o ba oin ho forma ne’ebé di’ak liu tan,  no husu mós tribunal halo servisu di’ak liu tan mezmu moras Covid-19 no situasaun polítika ne’ebé iha. * Jos