PTR Deolindo: Partidu Balun Labele Konkore Eleisaun Presiza Legalidade

Naunil Média (Díli), Prezidente Tribunal Rekursu (PTR) Deolindo dos Santos hateten partidu balun labele konkore ona eleisaun parlamentar, tanba Perde legalidade tuir lei partidu polítiku nian

“Iha partidu lubuk bo’ot iha partidu balun labele konkore ona tanba Perde ona sira nia legalidade tuir lei partidu polítiku nian mas kazu iha tinan oin ne’e ita ko’alia kona-ba eleisaun prezidensiál”, Dehan PTR Deolindo dos Santos ba jornalista hafoin sorumutuk  ho Prezidente Repúblika (PR) Francisco Guterres “Lú-Olo” iha palásiu Prezidensiál Nicolau Lobato Bairru Pite, segunda (06/12).

PTR hatutan,  Até agora seidauk iha partidu foun ruma ba iha Tribunal Rekursu depois partidu hirak ne’ebé ba Ministeriu Justisa  indefere tiha depois sira rekore ba tribunal rekursu no tribunal rekursu mantein desizaun ministéiriu nian,  iha partidu lima ka neen ida hanesan ne’e Perde sira nia estatutu legal nu’udar partidu atu konkore kualker eleisaun.

Deolindo hateten, Kompetensia tribunal rekursu nian ne’e bainhira xefí estadu termina ona data eleisaun,  mak tribunal foin hala’o servisu nune’e kandidatu sira bele aprezenta sira nia kandidatura.

“Entaun eleisaun prezidensiál ne’e ita atu ko’alia kona-ba kompetensia tribunal nian,  ne’e kuandu bainhira Prezidente Repúblika foti desizaun,  termina ona data ba eleisaun iha data ida ne’e mak tribunal sei servisu,  halo nusa maluk sira ne’ebé atu kandidata nia aan ne’e bele ba aprezenta sira nia kandidatura iha tribunal Rekursu”, Tenik Deolindo dos Santos.

Lider orgaun Judisiariu ne’e mós esplika tribunal sei haree katak kandidatura sira ne’e prienxe kriterius sira ne’ebé lei estabele,  ida ne’e mak foin ko’alia kona-bá eleisaun maibé tó agora tribunal seidauk bele halo buat balun,  tanba ne’e depende ba desizaun prezidente Repúblika nian.

Nia dehan,  Preparasaun tribunal rekursu nian ne’e lá’os buat foun ida,  tanba durante tempu barak nia laran tribunal rekursu sempre liga ho prosesu eleisaun ba Prezidente Repúblika nian,  no ba eleisaun jerál Parlamentu Nasionál nian ne’e kestaun normál so ke presiza forma para buat ne’e la’o di’ak liu tan.

Nia informa,  Partidu sira ne’ebé legalmente seidauk admitidu nu’udar partidu polítiku entaun seidauk bele tuir eleisaun no sira ne’ebé admitidu ona entaun bele no atu dehan katak,  sira ne’ebé foin dadauk ba ne’e komu seidauk formalmente rejistu iha tribunal rekursu,  hanesan partidu polítiku seidauk bele,  se hakarak entaun sei ba halo tan prosesu foun fali depois sira bele tuir eleisaun.*Jos