Responde Covid-19, EUA Apoiu Milaun $1.5 Ba MS
Nauni Media (Dili), Atu kombate no responde pandemia covid-19, Estadus Unidos America (EUA) ba Fundus Nasoens Unidas Labarik (UNICEF sigla Ingles), liu hosi Estadus Unidus ba Dezenvolvimentu Internasional (USAID), Apoia orsamentu milaun $1.5 ba Ministeriu Saude MS.
Enkaregadu Negosiu EUA iha TL, Tom Daley, hateten, Apoiu urjente ne’e sei ajuda kombate pandemia Covid-19 ne’ebé afeta ema hotu.
” Ha’u kontente hamutuk ho ita-bo’ot sira ohin hodi anúnsia fundu adisional dólar amerikanu millaun $1.5 ba asistensia Covid-19 oferese husi Estadus Unidus ba UNICEF, liu husi Ajensia EUA ba USAID”. Dehan Tom Daley, iha nia diskursu hafoin halo lansamentu ba orsamentu, iha salaun Palasiu das Sinjas Kaikoli, Kinta (09/12/).
Tom Daley Haktuir, hakotu pandemia no halo prevensaun no preparasaun ba ameasa sira hasoru seguransa saúde global iha futuru, ezije envolvimentu país hotu-hotu nian no kompromisu koletivu ida tenki servisu hamutuk.
Enkuantu liu husi kolaborasaun ho UNICEF, fundus foun ne’e sei ajuda fornese ekipamentu protesaun pesoál adisional ba sentru saúde komunitária 71, no autoridade saúde munisipiu 13 atu reabastese suprimentu sira, no proteje profisional saúde sira hodi hamenus transmisaun.
“Ami sei hadi’a fasilidade be’e mo’os, saneamentu no hijene nian iha sentru saúde komunitária hamutuk sanulu resin ha’at (14) iha Munisipiu Baucau, Covalima, Dili, Ermera, no Manatuto hodi halo prevensaun no kontrolu ba infesaun”. Haktuir nia.
Ho kontribuisaun ne’e total asistensia EUA nian hodi ajuda TL hodi kombate Covid-19 hamutuk dólar amerikanu miliaun $ 5.9 no fornese ona vasina P’fizer hamutuk 100,620 resin.
Iha fatin hanesan Diretora Jeral Prestasaun servisu MS Odete Viegas, Kongratula ba servisu hamutuk ne’ebe MS ho parseiru Dezenvolvimentu no UN agensia sira kontribui hodi bele reduz pandemia iha TL.
” Ho susesu ne’ebe mak MS iha la mesak maibe hamutuk ho ita bo’ot sira nia prezensa no apoiu hodi realiza ita nia servisu lubuk ida ne’ebe mak ita liu ona liu-liu iha prevensaun Covid-19 desde 2020 to’o agora konsege konteim no trata mais de 19 mil infetadus bele rekupera hotu no ema ne’ebe mate 122, Signifika esforsu lubuk ida ne’ebe mak governu no estadu hamutuk ho parseiru sira ita hatudu duni ita nia komitmentu ne’ebe mak bo’ot hodi salava ita nia povu no rai doben ida ne’e.” Dehan nia LTS
