Tempu Badak “Lú-Olo” Sei Halo Dialogu Ho Komunidade Munisipiu Rua
Naunil Média (Dili), Prezidente Repúblika (PR) Francisco Guterres Lú-Olo, sei hala’o diálogu ho Autoridade no Reprezentante Komunidade iha munisípiu Bobonaro iha loron 15 dezembru 2021 no iha Liquiça, iha 17 dezembru 2021.
Diálogu iha munisípiu rua ne’e , PR sei esplika kona-ba situasaun polítika rai-laran no rona preokupasouns husi autoridade lokál, organizasaun sosiedade sivíl, veteranus, konfisoins relijioza, foin-sa’e no estudante sira relasiona ho prosesu dezenvolvimentu iha nível nasionál no lokál.
Dialogu ne’e sei akompaña husi Membru Governu Konstituisional Da-Walu VIII, Atu hatán ba preokupasaun husi reprezentante sira kada munisípiu. Nune’e ba oin orgaun ezekutivu bele halo esforsu oi-oin hodi responde asuntus ne’ebé autoridade lokál, líder komunitária sira foti iha diálogu.
Informasaun ne’e www.naunilmedia.com asesu iha Pagina Ofisial, Prezidente Republika, Segunda (13/12).
Aman ba nasaun ne’, sei husik Díli ba munisípiu Bobonaro, iha loron, 14 dezembru 2021, no sei fila-fali mai Sidade kapitál, iha 18 dezembru 2021.
Prezidente Repúblika sei presta omenajen ba eróis no martires libertasaun Pátria iha Osoariu Maliana no Liquiça, kuda ai-simbolikamente no entrega ai tokon ida resin ba reprezentante husi munisípiu 12 no Rejiaun Administrativa Espesiál Oecusse-Ambeno (RAEOA) nu’udar parte husi kampaña ne’ebé Xefe Estadu inisia “Sidadaun Ida, Ai-oan Ida”.
Antes ne’e mós PR halo ona vizita traballu ba munisípiu Viqueque, Covalima, Lautem, Baucau, Ermera, Manufahi no Ainaro.*Jos