PR “Lú-Olo” Promulga Dekretu Lei Benefisia Família Ho Rendimentu Kiik
Naunil Media (Díli), Prezidente Repúblika (PR), Francisco Guterres “Lú Olo” promulga ona Dekretu-Lei atu implementa medida seguransa alimentar previstu iha Lei n°8/2021, 3 maiu, ne’ebé altera Lei n° 14/2020, 29 dezembru, refere ba Orsamentu Jerál Estadu 2021 no aprovasaun medidas ba apoiu sósiu-ekonómiku.
“Haree ba impaktu negativu husi pandemia Covid-19 iha ekonomia nasionál mak Governu propoin alterasaun ba lei 14/2020 ho medidas foun oioin, inklui medida seguransa alimentár. Lei ne’e fó kbiit ba sentru Lojístiku Nasionál (CLN), atu halo kontratu ho produtór lokál no/ka ho operadór komersiál sira seluk ho hetan ai-han nesesáriu hodi fahe ba ita-nia ema no família sira ho rendimemtu kiik tebes”, dehan liu husi Komunikadu ne’ebé Naunil Média asesu iha média Prezidensiál Repúblika nian iha palásiu Prezidensiál Nicolau Lobato Bairru Pite, Tesrsa, (14/12).
Liuhusi sosa ai-han, liuliu husi ita-nia agrikultor sira hodi fahe ba ita-nia ema no família vulnerável liu, Estadu Timor-Leste insentiva ita-nia produtór sira atu hasa’e sira-nia produsaun no nune’e, kontribui ba família agrikultór sira hodi moris-di’ak liu. Tanba fahe produtu husi agrikultor sira ba ita-nia ema no família timoroan sira ne’ebé vulnerável liu, Estadu Timor-Leste hatudu katak tau duni matan ba ita-nia ema iha tempu susar.
Dekretu-Lei ida ne’e fó atensaun espesiál ba ita ema no família sira ho rendimentu laliu dólar amerikanu 1,90 loron ida. Atu define sesé mak iha direitu ba apoiu espesiál ida ne’e, entidade responsável sira sei uza dadus husi rejistu uma-kain ida-idak iha suku ida-idak husi Ministériu Administrasaun Estatal no husi Ministériu Solidariedade Sosiál no Inkluzaun.
Ai-han ho valor dólar amerikanu tolu nulu (Usd 30.00) se fó ba sidadaun/sidadã ne’ebé rejista-an iha “Livru Rejistu Uma Kain” nu’udar Xefe família ka, bainhira labele simu, sei reprezenta husi membru ida husi Uma Kain ne’e, ho otas 17 ba leten.
Medida ida ne’e sei implementa ho osan husi Fundo Covid-19 ne’ebé tama iha Orsamentu Jerál Estadu no sei implementa to’o 31 dezembru 2021 maibé MECAE bele hatutan tan.
Diploma ne’e aprova iha Konsellu Ministrus iha 27 outubru 2021, tama iha Prezidénsia Repúblika iha 8 novembru 2021 no Prezidente Repúblika promulga iha 10 Dezembru 2021.
Ministru Koordenador ba Asuntus Ekonómikus, Ministru Finansas, Ministru Admnistrasaun Estatal no Ministra Solidariedade Sosiál no Inkluzaun mak sei regulamenta Dekretu-lei liu husi diploma konjuntu ida kona-ba oinsá implementa hodi benefisia ita nia-ema no uma kain sira ho rendimentu la liu dólar amerikanu 1.90 loron ida. *Jos