Xefí Suku Rai Fun Preokupa Nai-Ulun Vizita foin Taka Estrada Kuak

Naunil Média (Bobonaro), Xefí suku Rai Fun Manuel da Cruz Preokupa bainhira Nai ulun sira tun ba vizita iha Munisípiu mak eskapator sira foin taka estrada kuak no la vizita ne’e lahalo buat ida.

Autoridade lokal hato’o lia hirak ne’e bainhira dialogu aberta ho Prezidente Repúblika Francisco Guterres Lú-Olo iha Ginaziu Monicipal Maliana, Kuarta, (15/12).

“Horseik ha’u haree eskapator taka estrada kuak tanba Prezidente Repúblika atu mai vizita Munisípiu Bobonaro ne’e sentimentu ne’e hanesan povu kiik ida tanba bainhira eskapator ba taka estrada kuak, ba ha’u povu kiik ha’u hanoin hanesan Nai ulun atu mai ita taka estrada kuak mas kuandu la mai ita lahalo buat ida, tanba Preokupasaun ne’e tinan barak ona” , dehan autoridade lokál

Autoridade lokál ne’e husu ba guvernu tau konsiderasaun se guvernu dadaun ne’e la dada ahi pelumenus halo netik estrada ruma no pior liu mak aban bainrua Primeiru Ministru mai taka fali tan estrada kuak.

“Membru guvernu sira rona povu nia lian ba tau iha konsiderasaun too ona VIII guvernu lahatene bainhira se VIII guvernu la realiza dada ahi halo estrada ruma hanesan ohin ha’u hateten boot ida atu mai pior liu aban bainrua Primeiru Ministru mai taka fali estrada kuak ne’e mak dezenvolvimentu lae ne’e seidauk bele tanba boot ida mai ita lori eskapator ba taka estrada kuak para kareta ba mai sira senti katak ne’e dezenvolvimentu”, katak Manuel da Cruz

Nia dehan hanesan autoridade lokál bá vizita populasaun sira iha foho hateten nunka goja ukun aan ne’e tanba ahi Eletrisidade no bee moos laiha.

“Aldeia tolu no rua iha foho inan aman sira iha ne’ebá hateten kuandu ami bá vizita iha ne’ebá sira hateten ukun aan imi mak goja ami izoladu ne’e lagoja tanba de’it ahi laiha bee moos laiha ne’e  ami bele lori jerigen ba kuru iha bee matan, no pior liu ahi Sira sunu kamí, sunu minarai dezde avo beiala sira too ohin loron”, katak nia

Manuel esplika aldeia sira ne’ebé iha foho iha eskola no mós klínika mas kuitadu ahi laiha lahatene eskola ne’e aprende saida kalan labarik sira laestuda no badiu de’it ona tanba ahi laiha

Nia hateten povu hili tenke mós lori povu ba naroman la’ós povu hili mak too ona VIII guvernu maibé povu nafatin hela iha nakukun laran.

Iha fatin hanesan Vice Ministru Obras Públika Nikolau Lino Freitas hatan ba preokupasaun sira ne’e hateten rehabilitasaun estrada urbana iha Maliana ne’ebé dadaun ne’e atiru guvernu tau ona ba prioridade iha tinan 2022 no KAFI mós aprova ona

“Rehabilitasaun estrada urbanas Maliana ohin xefi aldeia ida dehan katak prezidente Repúblika mai ona mak maki sira ne’e mai atiru no fila mota lori fila fali ida ne’e mós ita tau ona ba prioridade iha tinan 2022 tama iha 23 kilo metru ba iha programa ne’e no iha fulan rua liu ba KAFI mós aprova ona”, katak Vice MOP

Membru guvernu ne’e mós esplika Rehabilitasaun estrada rural hamutuk 50.7 kilo metru kompostu husi postu administrativu neen (6) no suku ho aldeia sira ne’ebé iha Munisípiu Bobonaro mós inklui hotu ona ne’ebé nia kilo metru distansia estrada sei investe no sei kontrui iha tinan oin hamutuk 50.7 kilo metru.*Jos