FEATUREDIkus LiuNewsPolitika

PR “Lú Olo” Hasai Ferias Husi 21 Dezembru Tó 5 Janeiru 2022

Fahe Tutan

Naunil Media (Díli), Prezidente Repúblika (PR) Francisco Guterres “Lú Olo”,  Iha direitu ba hasai férias, loron tolu nulu (30), tinan-tinan, ho direitu ba pagamentu remunerasaun tomak. Maibé, tinan-tinan Prezidente Repúblika la hasai férias tuir lei mak determina, tanba motivu servisu, hanesan mós titular no membru órgaun soberania sira seluk.

“Ba tinan  2021, Prezidente Lú Olo haruka ona karta ba Prezidente Parlamentu Nasional katak tama férias  husi loron 21 dezembru to’o 5 de janeiru. Durante períodu ne’e Prezidente Lú Olo  sei la tama Palásiu hanesan baibain maibé sei hala’o nafatin servisu sira tuir ninia kompeténsia nu’udar órgaun unipesoál (ema ida de’it)”, liu husi Komunikadu ne’ebé Naunil Media asesu iha média Prezidensiá Repúblika nian iha palásiu Prezidensiál Nicolau Lobato Bairru Pite, Tesa (21/12).

Nu’udar órgaun unipesoal, Prezidente Repúblika labele delega ba ema ne’ebé de’it knaar importante ba vida Nasaun no Povu nian hanesan promulgasaun (ka veto) ba Lei no Dekretu-Lei sira.

Knaar importante tebes ida ba Prezidente Repúblika, hosi ohin ba oin, mak tetu Dekretu n. 55/V aprova husi Parlamentu Nasional iha loron 18 dezembru 2021 kona-ba Orsamentu Jeral Estadu 2022. 

Dekretu ne’e tama horseik iha Palásiu no Prezidente Repúblika sei haree ida ne’e durante períodu férias tanba diploma ida ne’e importante tebes ba vida Nasaun no Povu nian. Aleinde Lei Orsamentu Jeral Estadu, iha mós diploma legal lubuk ida ne’ebé Prezidente Repúblika tenke foti desizaun durante períodu férias.

Tuir Estatutu Titulares Órgauns Soberania, (alínea a), númeru 4, artigu 10, Lei n°7/2007, 25 jullu altera husi Lei n°7/2017, 26 abril), tinan-tinan, titular no membru órgaun soberania sira iha direitu ba períodu férias loron 30 no bele akumula ba beibeik bainhira labele hasai tempu férias, tanba motivu servisu.  Tuir lei haruka, sira sei la lakon direitu atu simu remunerasaun iha final mandatu, karik la hasai períodu tomak férias tinan-tinan.*Jos

Leave a Reply

Your email address will not be published. Required fields are marked *