Eis Padre Martinho Kandidatu Ba PR Laos Partidu, Bensaun Husi-Papa
Naunil Media (Díli), Eis Padre Dispensadu Martinho Gusmão ofisialmente deklara an bá públiku ninia kandidatura hodi kompete bá Prezidenti Repúblika (PR) periódu 2022-2027, la’os husi partidu, bensaun husi Santu Padre Papa Francisco ho Amu Bispu.
“La hetan bensaun ka tula liman husi partidu polítiku sira ne’e, maibé hetan bensaun husi Santu Padre Papa Francisco ho Amu Bispu sira. Nu’udar sidadaun orijinária ohin deklara ofisialmente no publikamente nu’udar kandidatu ho karakter inkluzaun”, dehan kandidatu eis padre Martinho Gusmão deklara liu husi konferensia imprensa ba jornalista sira iha nia residênsia Metiaut, tersa (18/01).
Nia hatutan, razaun nia kandidatu nu’udar inkluzaun, tanba durante ne’e nia laiha partidu, maibé moris hanesan sidadaun baibain, maibé mós la’ós ema independente.
“Ha’u sente Santu Padre tula liman ona, Bispu sira tula liman ona di’ak ona, karta husi Santu Padre Amu Papa rasik, la’ós suporta nia haruka halo kampaña atu hili ha’u la’e, mais ha’u dehan, ida-ne’e suporta morál no suporta espirituál husi Santu Padre rasik husi Kardeal Luis António Tagle”, Katak nia.
Martinho Gusmão agradese bá Partidu Unidade Dezenvolvimentu Demokrátika PUDD, maske partidu ki’ik, maibé iha korajen nafatin atu lori prosesu ne’e bá oin.
“Ha’u hakarak agradese mós bá PUDD, partidu ki’ik ida-ne’ebé korajen teb-tebes no laran metin teb-tebes husi kbiit oituan ne’ebé iha, ita koko atu lori prosesu ne’e bá oin, partidu ne’ebé seidauk komete erru iha nasaun ida-ne’e nia laran, partidu ne’ebé harii husi ki’ak no susar”, Tenik nia.
Nia mós agradese bá Partidu CNRT ho nia Prezidenti Kay Rala Xanana Gusmão ne’ebé konvida nia bá iha loron 13 fulan Outubru 2021 iha Mehara Munisípiu Lautém, iha loron ne’e mak nia deside aan atu kandidatu bá Prezidente Repúblika.
Maibé nia klarifika, ninia kandidatura ne’e, la’ós tula liman husi Líder Karismátiku, Kay Rala Xanana Gusmão, tanba nia rasik mós seidauk husu ema ida atu tula liman bá nia.
Nia dehan, Tempu badak, Kandidatu Martinho Gusmão sei bá rejista iha Tribunál Rekursu ho apoiante rihun 5 resin tuir kritériu no lei eleisaun prezidensiál nian”, Tenik nia.
Jornalista Ana
Editór Lop
