Governu Sei Dezemvolve Rádiu Komunidade Tokodede
Naunil Media (Dili), Governu Konstituisional da Walu, Liu hosi Sekretáriu Estadu Komunikasaun Sosiál (Sekoms), sei dezemvolve preokupasaun ho difikuldade jornalista sira iha Rádiu Komunidade “Tokodede” durnte ne’e.
Sekoms, Merício Juvinal dos Reis “AKARA,” informa lia hirak ne’e ba jornalista sira, Bainhira hala’o vizita servisu ba Rádiu Komunidade “Tokodede.”
Vizita servisu Serkretariu Estadu nian ne’e, atu hare’e direitamente kondisaun rádiu nian hodi rona preokupasaun no difikuldade ne’ebe mak estrutura rádiu no jornalista sira infrenta.
“ Ba preokupasaun ne’ebé Jestór hato’o ona, ha’u rejista sei fó orientasaun no buka mekanizmu ho diresaun relevante atu bele hadia di’ak liutan transmisaun hodi bele kanaliza informasaun ba komunidade Munisipiu Liquica,” Dehan Merício Juvinal“Akara”. Iha Edifisiu Rádiu Tokodede, Segunda, (24/01).
Nia hateten, Sidadaun hotu iha diretu ba informasaun tuir lei haruka no laiha sidadaun ida mak marjinalizadu husi informasaun.
Governante ne’e husu ba rádiu komunidade sira atu servisu profisionál no divulga informasau ne’ebé kredivel iha tempu kampaña Eleisaun Prezidensiál 2022 no Parlamentár 2023.
Iha fatin hanesan Jestór Rádiu Komunidade “Tokodede”, Eduardo Techea Exposto haktuir, Ekipamentus ne’ebé sira utiliza tuan ona, no menus transporte no sira seluk inklui liña transmisaun ne’ebé la kobre iha munsípiu Liquica.
Antes ne’e SEKOMS hala’o ona vizita servisu ba rádiu komunidade Comoro no planu sei vizita mós rádiu komunidade sira seluk iha tempu besik.
Entertantu Sekoms apresia ho servisu rádiu komunidade la’o ho di’ak tanba autoriedade ho jestór sira apoiu malu.Latu
