Virgílio Dispensadu Atividade CI, Kandidatu Ba PR
Naunil Media (Díli), Prezidente Conselho Imprensa de Timor-Leste, Virgílio da Silva Guterres dispensadu nia atividade nudar prezidente CI durante fulan tolu, hodi kandidatu independente ba Prezidente Repúblika (PR) hodi kompete eleisaun jerál prezidensiál ba tinan 2022/2027.
“Hahú ohin depois de eleisaun ha’u sei dispensadu husi ha’u nia funsaun hanesan prezidente conselho imprensa, ida ne’e tanba lei eleitoral haruka katak, kandidatu sé de’it mak kaer kargu públiku ou privadu iha direitu ba dispensa husi nia funsaun, no mós durasaun ne’ebé mak nia simu durante nia kargu pozisaun ne’e”, Dehan prezidente CI ba jornalista liu husi komunikadu imprensa iha salaun CI Kintal-Bo’ot, segunda (24/01).
Tanba ne’e mak ohin ha’u hakarak hato’o ba públiku katak durante hala’o funsaun hanesan conselho imprensa, tanba ne’e ha’u pronunsia ha’u nia kandidata an ba prezidente da Repúblika, entaun ha’u tenki husik ha’u nia funsaun hanesan prezidente CI, Dehan nia.
Prezidente CI haktuir, Lei komunikasaun sosiál estatutu Conselho Imprensa mós hateten katak, bainhira prezidente CI auzente ruma, nia tenke ninia ou índika konseleru sira seluk atu hala’o funsaun prezidente CI ninian.
“Ha’u hakarak hato’o ba públiku katak, hahú husi ohin dia 24 fulan Janeiru ba to’o iha dia 24 fulan Abríl tinan ida ne’e, funsaun hanesan prezidente CI nian, ha’u indika señór Espedito Loro Dias Ximenes mak sei interinamente hala’o knaar hanesan prezidente CI interinu”, Nia afirma.
Jornlista LTS
Editor Lop
