Kandidatu Lere Rejistadu ho Proponente 9.000
Naunil Media (Díli), Kandidatu independente ba Pezidente Repúblika períudu 2022-2027, Lere Anan Timur, rejistadu iha Tribunal Rekursu (TR), Ho proponente mai hosi Munisípiu 12, inklui Rejiaun Administrativa Espesiál Oecusse Ambeno (RAEOA), hamutuk 9.000.
Ekipa susesu kandidadatu Independente Lere Anan Timur, rejistadu hafoin submete dokumentu hanesan karta deklarasaun ho aseitasaun hosi kandidatu nian, karta designasaun reprezentante, dokumentu komprovativu hanesan lista asinatura, kartaun eleitorál hosi proponente sira.
Rejistu no submisaun dokumentu hosi kandidatu ne’e reprezenta hosi portavóz ekipa susesu, Vito Simões.
“ Iha Proponente rihun 20-resin, maibé tanba ami hakarak fasilita servisu TR nian atu halo nia servisu, tanba ne’e ami lori de’it dokumentu proponente 9.000, hodi mai rejista, Kandidatu Lere sente kontenti tanba nia hanesan kandidatura hosi povu no veteranu sira,” Dehan Vito Simões, ba Jornalista sira, iha TR, Kuarta (02/02/2022).
Nia hatutan, kandidatura independente, maibé konsidera nafatin FRETELIN hanesan Filozofia Politika ida ho nune’e militante barak hosi partidu ne’e fó nafatin suporta no sei la husik kandidatura ne’e mesak.
” Ami militante Fretilin barak mak mai hamutuk ho Jeneral reformadu Lere Anan Timur, tanba ami lakoi husik ema ida ne’ebe luta durante iha tempu naruk fo nia a’an tomak ba estadu ida ne’e ba povu ida ne’e no ba Fretilin, tantu ami sei la husik ami lakoi aban bainrua ami nia oan sira dehan fali mai ami husik imi nia Aman Lere Anan hanesan ne’e.” Tenik nia.
Nia Realsa liu tan, Buat hotu la’o di’ak, inklui kordenasaun ho partidu sira.
Nune’e Aban Lere Anan Timur, sei foti kartaun iha Membru Comite Central Fretilin (CCF), Iha loron 5 sei halo deklarasaun ofisial iha Munisipiu Ainaro.MJ1
