CI Husu Jornalista Kobertura iha ElPRE Tenke Hetan Akreditasaun Husi-STAE

Naunil Media (Díli), Conselho Imprensa (CI) husu ba jornalista kobertura iha eleisaun prezidensiál tenke hetan akreditasaun husi Sekretáriu Tekníku Administrasaun Eleitoral (STAE) no presiza kartaun profesional.

Tuir Presidente Interinu Conselho Iprensa  (CI)  Expedito Loro Dias Ximenes katak, CI ohin konvoka reuniaun  ho nain ba media Diretór, Xefíi redasaun no editór sira atu ko’alia kona-bá prosesu kobertura iha eleisaun presidensiál iha tinan 2022/2027.

Tanba jornalista iha media Timor-Leste sira mós hakarak halo kobertura diak fo informasaun ne’ebé dignu ba publiku nune’e mos sira presija kredensial.

Tan ne’e iha prosesu kredensial ne’e la’o ho di’ak sira mos konvida husi STAE atu mai esplika tekniku lolos oinsa kobertura, la’os deit iha Díli, maibé mós iha munisípiu sira.

“Iha prosesu kobertura ne’e CI iha konkordansia katak jornalista sira atu hetan kredensial ba kobertura presija iha karteira profesional, no karteira profesional ne’e iha nia regras rasik oinsa ema ida atu hetan karteira profesional”, Dehan Presidente Interinu CI ba jornalista iha Edifisiu CI  Quintal Boot,  Kinta (03/02).

Prezidente interinu CI haktuir, Atu hetan karteira profesional  bainhira lei Komunikasaun sosiál iha, ema ne’e halao ona sira nia servisu  hanesan jornalista ka halao atividade jornalizmu nian iha tinan lima ka sanulu antes.

Enkuantu ida fali lei komunikasaun ne’e iha jornalista ne’e foin mak hala’o nia knaar, ne’e CI konkorda atu bele fo hanesan estagiadu tanba karteira estajiadu profesional sira ne’e iha prosesu tinan rua nia laran atu hasai husi estagiadu ba professional, dehan nia.

“Tanba prosesu ne’e presija lalais ohin CI koalia mos ho nain ba midia, Xefí  Redasaun, editór no Diretór sira, depois iha diskusaun ne’e atu hare katak bele ka lae konsellu Imprensa fasilita lalais ida prosesu estagiadu ne’e hodi nune’e jornalista sira bele halo kobertura iha Dili no mos iha munisipiu”,Tenik nia

Nune’e ba sirkulasaun motorista ne’ebe tula jornalista sira ne’e iha prosesu ketak ida, Jornalista nia ho kartaun kredensial ne’ebe hetan husi STAE nia bele vota iha fatin ne’ebe deit nia halo kobertura hanesan motorista sira bele ba fatin ne’ebe mak hanesan iha sentru votasaun  paralelu, dehan nia.

“Ami buka atu halo konkordansia ho STAE tanba atu hetan karteira profesional ne’e prosesu naruk tanba sira ne”e diakui ita senti katak sira ne’e halao duni knaar jornalista ne’ebe iha setifikasaun husi midia nain ka fatin ne’ebe sira servisu ba, entaun CI halo prosesu estajiadu ne’e lalais”, Nia Esplika.

Iha fatin hanesan Xefí Departmentu Informasaun Públika no Relasaun Externa-Sekretáriadu  Teknika Administrasaun Eleitoral(IPRE-STAE) Marquita Imaculada Da Costa katak,  Antes atu tama ba iha loron dekretasaun  Eleisaun Presidensial  STAE  sempre marka enkontru ho CI hodi hadiak liu tan ita nia servisu hamutuk tanba uluk midia hotu-hotu aseseu ba STAE atu hetan kredensial maibe atu hadiak prosesu administrasaun entaun tenki liu husi CI.

Tanba media hotu tenke liu husi CI mak bele ba halo kobertura iha prosesu eleisaun nian maibé antes atu ba prosesu elesisaun sira tenki hetan akreditasaun husi STAE, nia dehan.

Nune’e STAE hein simu de’it dadus jornalista sira nian husi CI  tantu  motorista ka administrasaun importante mai STAE tenke simu lista husi CI, nia hakotu. LTS