Konfrontu Tasi-Tolu, KRAM Konsidera La’ós Arte Marsiais

Naunil Media (Díli),  Mosu dezentendementu konfontru iha Tasi-Tolu segunda feira (01/02) lorokraik  ne’ebé mak deskonfia envolve husi grupu arte marsiais Ikatan Keluarga Silat IKS PTL no arte rituais 77, ne’e  Komisaun Reguladora Arte Marsiais (KRAM) konsidera ne’e  la’ós Arte Marsiais,  maibé ne’e komete husi sidadaun Timoroan, tanba la’ós uza atributu arte Marsiais hodi asalta malu.

Kestaun ne’e hato’o husi Prezidenti Komisaun Reguladora Arte Marsiais (KRAM),  Octavio da Conceicao ba jornalista sira iha nia knaar fitin,  kuarta (03/02).

“Loron hirak liuba akontesimentu konfrontu iha Díli laran liuliu Tasi-Tolu ne’e, komisaun regulador arte marsial konsidera aktu sira ne’e komete husi husi sidadaun Timoroan individu ida-idak ka grupu ida ka rua mak halo konfrontu ne’e,  mak perturba orden públiku rezulta sitausaun seguransa iha Díli laran ladun hakmatek”,  dehan Octavio.

Tuir Octavio, Bainhira ko’alia kona-bá arte marsiais atu halo krime, sira hatais atributu arte marsiais ba asalta malu, tuda malu hafoin bele dehan arte marsiais.

Octavio esplika, Kuandu ema ida-idak tuku malu asalta malu ne’e krime publiku, ne’e responsabilidade ida-idak nian, semak komete iha krime publiku ne’e sei la’o tuir nia prosesu no responsabilidade kriminal ida-idak, autor ne’ebe mak komete krime publiku, agora Polísia Nasional Timor-Leste (PNTL) ne’e sira nia servisu bele halo atuasaun.

KRAM haree liuliu ba prosesu regulasaun, halo lei atu kontrola sira nia atividade, oinsa mak kapasita sira nia kapasidade entermu organizasaun, dehan nia.

Prezidente KRAM ne’e explika, Kona-bá grupu sira ne’ebé mak halo kriminal ne’e ida-idak responsabilidade tuir prosesu ne’ebe PNTL hala’o. Situasaun agora konfrontu loron hirak liuba iha hela prosesu investigasaun, komandu polisia nasional Timor-leste mak hatene.

“Bainhira PNTL fo sai ona kada autor sira ne’e reprezenta duni sira nia organizasaun arte marsiais mak ita foin bele hatete autor sira ne’e mai husi organizasaun arte marsiais ida-idak”,  tenik nia.

Tuir nia,  to’o agora publiku hatene katak halo asaun ne’e grupu arte marsiais maibe KRAM nia hanoin sidadaun Timoroan ne’ebé komete aktu violensia publiku.

Tuir informasaun ne’e mak espaila ona iha públiku katak kazu ne’e akontese hafoin família matebian lori mati isin sai husi sala mortuariu iha Hospital Nasionál Guidu Valadare (HNGV) Díli, ba tasi tolu, hafoin to’o de’it iha Bebora grupu balu halo ona asaun hodi tuda no to’o iha fatuhada, Bairu Pite tama to’o iha Tasi-Tolu ho nune’e situasaun sai manás liu tan.

Enkuantu husi kazu iha Tasi-Tolu ne’e ema ida mak hetan kanek no ema na’in 28 polísia Nasionál Timor Leste (PNTL) kaptura ona inklui mós prende motor sanulu resin. Char