Governo Sei Konstrui Postu Seguransa Iha Fronteira, Hodi Antisipa Movimentu Ilegál
Naunil Média (Díli), Posibilidade movimentu ilegál sempre iha, maibé Governo sei tau matan nafatin, hodi kria tán postu seguransa foun ba Polisia Nasional Timor-Leste (PNTL), hodi antisipa mós ba movimentu ilegal no krime organizadu sira.
“Agora dau-daun iha fronteira orariu ba ema sira ne’ebé tama iha terrestre maka, loron kuarta ema tama no segunda maka sai inklui mós atividade merkadoria.
Iha sidadaun sira ne’ebé maka tama iha Timór-Leste, tenki aprezenta sertifikadu vasinasaun kompletu ka hatudu teste PCR dentru 41 oras ba ofisiál fronteira para sira bele tama iha Timór-Leste, maibé sekarik sira la vasina, tuir lei, sira tenke tama kuarentena hanesan normál no sira maka sei selu rasik”, dehan, Vise Ministru Interior, Antonio Armindo, ba jornalista sira iha nia knaar fatin Ministériu Interiór, Vila-Verde, sexta feira, (11/02).
Nia hatutan, daudaun ne’e, Governo foku liu ba kontrolu máximu iha fronteira rai maran, no karik iha moviementu ilegál iha liña fronteira sei obrigatoriamente tama kuarentena no sei aplika multa.
“iha Movimentu ilegál semana tolu liubá kuaze laiha, maibé antes ida-ne’e iha ida ou rua, tanba ita hatene iha fronteira ho rai ida ne’ebé luan tebes entre postu ida ba postu seluk nune’e.
Iha esperansa katak, tinan ida-neé ba oin, kuandu iha mudansa maka sei koloka tán membru balu ba iha fronteira, liu-liu ba prienxe iha postu foun sira ne’ebé maka agora dadaun doadór husi Nasaun parseria sira halo ona, ho nune’e bele diminui ona movimentu ilegál no krime sira seluk”, Vise Ministru informa.
Vise Ministru Interior salienta, mezmu Governo la extende ona Estadu Emerjensia, maibé Governo produz ona dekretu lei númeru 26/2021 ne’ebé maka regula kona-ba ema tama no sai iha pontu integradu iha territóriu Nasionál. Ana