PTR Deolindo: Posibilidade Sorteiu ba Kandidatura Sei Fixsa Aban ou Bainrua
Naunil Media (Díli), Prezidente Tribunal Rekursu (PTR) Deolindo do Santos hateten, Posibilidade sorteiu ba kandidatura sira sei fixsa iha aban ou bainrua se karik kandidatu ida ne’ebé seidauk prienxe rekezitus ne’e la halo rekursu.
“Entaun fixsa ona data definitivu signifika iha posibilidade sorteiu ba kandidatura sira iha aban ou bainrua”, dehan PTR Deolindo dos Santos ba jornalista sira hafoin partisipa serimónia pose ba Vise Xefe Estadu Maiór Jenerál Forsas Armadas no Xefe Estadu-Maiór Forsas Armadas iha palásiu Prezidensiál Nicolau Lobato Bairru Pite, Tersa (15/02).
PTR hatutan, Kandidatu ida laprienxe rekezitu refere tenke halo rekursu to’o loron Tersa (15/02/22) oras tuku lima lokraik, no Juiz kolektivu sei deside iha prazu loron rua nia laran.
“Ita nia Kandidatura ida laprienxe rekezitu hanesan horseik ha’u esplika tiha ona, ne’ebé kandidata refere tenke ba halo rekursu to’o ohin tuku lima lokraik loron ida de’it, depois nia rekursu ne’e Juiz kolektivu sei deside iha prazu loron rua nia laran, sai signifika ohin hatama aban bainrua deside mak ita halo sorteiu se laiha rekursu orsida tuku lima”, katak PTR Deolindo
Nia dehan, Kandidatu hamutuk nain sanulu resin-hitu (17), iha ida mak laliu nain sanulu resin-neen (16) liu númeru sorteiu ba Kandidatura sira ne’e depois sei haree aban ou bainrua.
Antes ne’e Kandidatu Prezidente Repúblika Luís Alves Tilman, ne’ebé mak lapasa iha Tribunál Rekursu (TR), hafoin submete dokumentus tanba seidauk prienxe rekezitus ne’ebé mak lei haruka.
Entertantu, kandidatu ne’ebé Admitiu ona atu Konkore iha Eleisaun Prezidensiál periodu 2022-2027 mak hanesan, Kandidatu Independente, Ângela Freitas, Martinho Gusmão, Milena Pires, Rogério Tiago Lobato, Felizberto Araújo Duarte, Lere Anan Timur, Hermes Correia Sikiliras, Virgilio Guterres, Isabel Ferreira, Antero Bendito da silva, Constâncio Pinto, no Kandidatu ne’ebé mai husi Partidu Polítiku mak Armanda Berta do Santos (KHUNTO), Francisco Guterres Lú Olo (FRETILIN), Anacleto Bento Ferreira (PDRT), José Ramos Horta (CNRT), no Mariano Assanami Sabino (PD). *Jos
