Falur: F-FDTL Seidauk Simu Diretiva Halo Seguransa ba ELPREZ
Naunil Media (Díli), Xefe Estadu Maior Generál Falintil Forsa Defeza Timor-Leste (F-FDTL) Tenente General Falur Rate Laek hateten too agora komandu F-FDTL Seidauk simu Diretiva atu apoiu Polísia Nasionál Timor-Leste (PNTL) hodi fó seguransa ba Eleisaun Prezidensiál (ELPREZ)
Lia hirak ne’e hato’o husi Tenente General Falur Rate Laek ba Jornalista sira hafoin remata enkontru regular ho Prezidente Repúblika Francisco Guterres “Lú Olo” iha palásiu Prezidensiál Nicolau Lobato Bairru Pite, kuarta (16/02).
“Ate agora diretiva seidauk simu para atu apoiu asegura seguransa mas, ha’u hanoin seguransa ne’e Polísia Nasionál Timor-Leste (PNTL), mak halo no halo barak liu no sira mak tenke halo purke ne’e Seguransa ne’e lei mak define forsa la’ós ba lalin tun sa’e ba halo fali seguransa,” dehan Tenente General Falur Rate Laek.
Tenente General ne’e mós hato’o ba Xefe estadu kona-bá faze tranzisaun komandu, mak hanesan Vise Xefe Estadu Maiór no Xefe Estadu Maiór simu posse husi Prezidente Repúblika no mós sira halo preparasaun ba iha komandu hanesan atividade.
Nia dehan, Logistika mak problema ida ke kritiku kuantu mais ema aumenta, kuantu mais treinu aumenta, formasaun aumenta nesesidade logistika mós aumemta ne’ebé agora rekrutamentu ne’e iha ona juramentu ona, signifika tenke habelar nafatin infrastrutura para depois bele profesionaliza forsa sira, tanba ne’e sira mós hato’o no relata nafatin ba guvernu lor-loron saida mak akontese liu husi planu no programa.
Iha enkontru ne’e Prezidente Repúblika mós fó Mensajen ba F-FDTL katak mantein disiplina operasional ba forsa sira no mantein prontidaun mak hala’o nafatin servicu.*Jos
