Komisáriu Faustino: PNTL Preparadu Asegura Seguransa ELPREZ

Naunil Media (Díli), Komandante Jerál Polísia Nasionál Timor-Leste (PNTL), Komisáriu Faustino da Costa hateten PNTL Preparadu Asegura Seguransa ba kampaña no eleisaun prezidensiál (ELPREZ) periodu 2022-2027 mezmu hasoru dezafiu.

Lia hirak ne’e hato’o husi Komisáriu Faustino da Costa ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, Kinta (17/02).

“Klaru hanesan baibain ita dehan Polísia Nasionál Timor-Leste PNTL mak halo servisu ida ne’e, preparasaun halo loos duni katak preparadu klaru ke PNTL hasoru dezafius, hotu hatene iha tempu ne’e aleinde Pandemia no tempu estadu kalamidade dezastre sira, no dezafiu ida interna mak rekursu,  maibé sei koloka masimu membru hotu polísia nian komesa husi kampaña too eleisaun”,  dehan Komisáriu Faustino da Costa.

KOMJER hatutan,  Enkontru semanal ho Prezidente Repúblika ne’e mós komandu aprezenta preparasaun Polísia Nasionál Timor-Leste nian,  dadaun ne’e to’o ona iha ne’ebé no kordenasaun ho se ba Xefí estadu.

“Ita bo’ot sira akompaña situasaun hirak ne’e mak komandu enkontru semanal ne’e aprezenta preparasaun Polísia Nasionál Timor-Leste nian, to’o iha ne’ebé no kordenasaun halo nusa ho se se ita ne’e mak aprezenta ba Prezidente Repúblika”, katak KOMJER.

Iha enkontru ne’e Prezidente Repúblika mós fó hanoin nafatin ba komandu katak, kontinua servisu no buat ida imparsial ne’e importante para atu asegura buat hotu la’o di’ak. *Jos