Komisáriu Faustino: Tempu Kampaña Joven Kuidadu Aan

Naunil Media (Díli), Komandante Jerál Polísia Nasionál Timor-Leste (PNTL) Komisáriu Faustino da Costa hateten tempu kampaña ba eleisaun prezidensiál joven sira tau aan no kuidadu aan nune’e ema ruma labele aproveita.

“Se ida ne’e mak ita boot sira tau, tempu agora ita bolu buat ida naran preparasaun ba kampaña eleisaun, tau ita boot sira nia aan, la’ós sai joven ne’ebé ema ruma sei aproveita ita bo’ot sira ida ne’e mak importante”, dehan Komisáriu Faustino da Costa ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha palásiu Prezidensiál Nicolau Lobato Bairru Pite, Kinta, (17/02).

KOMJER hatutan,  Joven mak futuru ba nasaun oinsá para ohin loron bele prepara aan, sai futuru ida ne’ebé di’ak, tanba aman sira uluk luta ba rai ida ne’e ikus mai para  konsidera Heroi ba libertasaun nasionál.

Komandante PNTL ne’e husu mós ba joven ida-idak tau iha nia neon, nia hanoin katak joven sira mós loron ida sai Heroi ba dezenvolvimentu Nasionál ba rai ida ne’e nian

Faustino esplika,  Joven sira buka oinsá para atu bele sai Heroi ba dezenvolvimentu Nasionál, halo preparasaun ba ida-idak nia aan atu bele halo atividade ne’ebé kontribui hahu husi familia Bairo, Aldeia, no Suku. *Jos