FEATUREDIkus LiuNewsPolitika

Juventude Laclo Hato’o Komunidade Nia Halerik Ba PR Lú Olo

Fahe Tutan

Naunil Média (Díli), Juventude afetadu dezastre naturais husi Postu Administrativu Laclo, Munisípiu Manatuto, hato’o Komunidade nia halerik ba Xefe Estadu, tanba hahú Kalamidade 4 Abríl ne’ebé akontese to’o agora Governu seidauk halo rekuperasaun.

Kestaun ne’e hato’o husi Juventude no representante komunidade Postu Administrativu Laclo, Vitorino de Jesus da Costa Oliveira, ba Jornalista sira hafoin remata hasoru malu ho Prezidente Repúblika (PR) Francisco Guterres “Lú Olo” iha palásiu Prezidensiál Nicolau Lobato Bairru Pite, Sexta, (18/02).

“Ami hato’o preokupasaun ne’ebé maka agora dadauk iha Postu Laclo, liu-liu kalamidade ne’ebé akontese iha dia 4 Abril to’o agora halo povu iha Postu Administrativu Laclo, halerik hela ba dezastre kuaze maioria ba sira nia natar, to’os no hela fatin ne’ebé maka agora dadauk seidauk iha rekuperasaun ruma husi ita-nia Governu, tanba ne’e maka ami hakarak hakbesik an direita ba Prezidente Repúblika,”dehan Vitorino.

Juventude Laclo ne’e hatutan, natar ho to’os ne’e hahú kedas husi área ne’ebé maka baliza ho Aileu, husi natar ne’e to’o iha Munisípiu Manatuto estraga hotu ho volume kuaze 500 hektares maka oras ne’e estraga totál ba irigasaun tomak ne’ebé maka iha komunidade utiliza, dadaun ne’e labele utiliza tan, tanba estraga hotu. Maibé to’o agora seidauk hetan apoiu ruma, no antes ne’e husi ekipa Ministériu Solidaridade Sosial (MSS) maka ba haree ona, maibé seidauk iha rekuperasaun ruma ba komunidade.

“Kona-ba apoiu to’o agora ami seidauk iha apoiu ruma, foin lalais iha dia 15  Abril liu ba iha 2021 ne’e, iha ekipa ida husi Ministériu solidaridade sosial ba iha ne’ebá, maibé ba rekoperasaun ne’e ba komunidade to’o agora seidauk iha ho di’ak,” nia esplika.

Vitorino deklara, esensial liu maka aldeia rua (2) hanesan aldeia Laububu ho aldeia Haelokor ne’ebé maka sira nia hela fatin ne’e labele utiliza tan, tanba afetadu husi kalamidade ne’ebé maka akontese momento ne’e, husi aldeia Laububu nian uma-kain hamutuk 140, aldeia Haelokor uma-kain hamutuk 108.

“Preokupasaun sira ne’e hato’o hotu tiha ona ba Governu, maibé too agora seidauk iha resposta ida tantu husi aldeia Laububu no Haelokor, tanba sira nia hela fatin kuandu tempu udan makaas entaun sira trauma ho sira-nia hela fatin no iha tempu kalan sira buka fatin ne’ebé seguru hodi hela”, reprezenta komunidade akresenta.

Iha enkontru ne’e, Prezidente Repúblika mós fó resposta ba sira katak, preokupasaun hirak ne’e  depois sei bolu Ministeriu relevante hodi hato’o nomós fó motivasaun nafatin ba komunidade Postu Administrativu Laclo, labele tauk nune’e labele sofre tan*Jos

Leave a Reply

Your email address will not be published. Required fields are marked *