Falur: Rekrutamentu F-FDTL Foti De’it Joven 2.400 Uluk Apuradu
Naunil Media (Díli), Xefe Estadu Maiór Generál das Falintil Forsa Defeza Timor-Leste (F-FDTL), Tenente General Falur Rate Laek hateten, Kontinuasaun ba rekrutamentu membru Falintil Forsa Defeza Timor-Leste (F-FDTL) foun no foti de’it joven na’in 2.400 ne’ebé antes ne’e apuradu, maibé sei teste tan atestadu médiku.
“Para atu rasiona ita nia rekursu finanseiru ho ekonómiku entaun ita foti de’it Timor-oan sira ne’ebé uluk apuradu rihun rua atus haat (2.400), maibé ita sei halo tan atestadu médiku ida no atestadu médiku ne’e tenke nesesariu, halo para konfirma nia moras ka lamoras,” dehan Tenente General Falur Rate Laek ba jornalista sira hafoin enkontru ho Prezidente Repúblika (PR)Francisco Guterres “Lú Olo” iha palásiu Prezidensiál Nicolau Lobato Bairru Pite, Kuarta, (23/02).
Tenente General hatutan, Rekrutamentu ba membru F-FDTL foun ne’e, hahú no hala’o tiha ona iha tinan kotuk, tanba ne’e agora hatutan de’it prosesu ne’ebé uluk halo selesaun ba joven 2.400, depois sira halo kompleta tan de’it ida ne’e para lalika halo dispeza barak.
Falur Rate Laek argumenta katak joven sira ne’ebé uluk hili tiha ona, ba mak laliu ne’e sei selesiona fali ida ne’e hamutuk atus neen rua (602) ho tan rezerba uituan se kuandu balun ba tama formasaun mak halai lakon no balun keta la auguenta nune’e prense nafatin.
Nia dehan, Kona-bá fardamentu ba membru foun sira ne’e iha armajen kompletu ona, no uza maibé difikuldade balun sei kompleta tanba orsamentu agora aprova tiha ona, dala ruma atraza mak Pandemia Covid-19, iha tiha fatin sira ne’ebé mak baibain sosa ba ne’e mak orsida sai obstaklu ida.*Jos
